Песков Зеленскийнинг Қозоғистонда музокара ўтказиш таклифига муносабат билдирди

Кремль матбуот котиби Дмитрий Песков Украина Президенти Владимир Зеленскийнинг Қозоғистонда Украина ва Россия ўртасида музокаралар ўтказиш ҳақидаги таклифига муносабат билдирди. Бу ҳақда у бугун, 24 сентябрь куни РБК радиоси эфирида гапирди.

Песковнинг сўзларига кўра, Украина Президенти илгари ҳам кўплаб вариантларни илгари сурган, бироқ улар Россия учун “мутлақо мақбул бўлмаган” давлатлар бўлган. Масалан, Швейцария ва Австрия тилга олинган, лекин Песков уларни “де-факто нейтрал эмас” деб атади.

Шу билан бирга, у Россия Президенти Владимир Путиннинг жорий йилнинг сентябрь ойи бошида Зеленский билан учрашувни Москвада ўтказишни таклиф қилганини эслатди. Ўшанда Путин Россия пойтахтини “энг яхши жой” деб атаган ва Украинага хавфсизлик ҳамда барча шароитлар кафолатланишини айтган. 

Песковнинг фикрича, учрашувни бошқа жойда ўтказишга бўлган чақириқлар “ортиқча талаб” ҳисобланади. 

Зеленский Москва эса вариантини қатъиян рад этиб, бу уруш давом этаётган бир пайтда мутлақо мақбул эмаслигини айтганди. У бунга мисол қилиб: “Бу худди мен Путинни Киевга келишга мажбурлаганимдек гап”, деган.

Шунингдек, АҚШ Президенти Дональд Трамп Путин ва Зеленский учрашувига чақириб, унда ўзи ҳам қатнашиши мумкинлигини билдирди. Бироқ Германия канцлери Фридрих Мерц ва Туркия Президенти Ражаб Тойиб Эрдўған каби айрим етакчилар яқин орада бундай саммитнинг бўлишига шубҳа билан қарамоқда.

Эслатиб ўтамиз, аввалроқ Украина Президенти Владимир Зеленский Нью-Йоркда Қозоғистон Президенти Қосим-Жомарт Тўқаев билан учрашганди. Мулоқот чоғида икки давлат раҳбарлари иқтисодий ва гуманитар соҳалардаги ҳамкорлик масалаларини муҳокама қилган. Владимир Зеленский Украина ҳудудидаги вазият юзасидан ўз қарашларини баён қилган.

Кейинроқ эса Зеленский “Fox News” телеканалига берган интервьюсида Россия билан эҳтимолий музокаралар олиб бориш жойи ҳақида фикр билдириб, Қозоғистонда ҳам учрашув ўтказишга тайёрлигини айтганди. У журналистнинг саволига жавобан Россия Президенти Владимир Путин билан учрашувга розилигини тасдиқлаган. Шу билан бирга, Украина етакчиси Москвага бориб музокара ўтказолмаслигини, аммо бошқа вариантларга очиқлигини таъкидлаган.