АҚШ Марказий Осиёда ахборот урушидан воз кечди – Розенблюм

АҚШнинг Ўзбекистондаги собиқ элчиси Дэниел Розенблюм Америка Марказий Осиёда “ахборот урушидан воз кечганини”, бунинг ортидан Россия ва Хитой таъсири учун бўшлиқ пайдо бўлганини айтди. Бу ҳақда у жорий йилнинг 19 сентябрь куни Йель университетидаги Гуманитар квадрат залида қилган нутқида сўз очди.

Унинг “Ёлғон оқимини жиловлаш: Марказий Осиёда Россия дезинформациясига қарши кураш” мавзусидаги маърузасини тахминан 45 киши аудиторияда ва 35 киши Zoom орқали тинглаган. Розенблюм 6 йиллик тажрибасига таяниб, Россиянинг АҚШ дипломатларини беқарорлик келтирувчи куч сифатида кўрсатишга уринган тинимсиз дезинформация кампанияларини қайд этган. Масалан, 2023 йилда рус ОАВлари уни Қозоғистонда НАТО базасини очганликда айблаган, аслида эса Розенблюм АҚШ маблағи ҳисобидан қурилган тинчликпарварлик институтининг конференция марказини очишда иштирок этган.

“Бундай абсурд фикр устидан кулиш осон, аммо Россия ахборот операцияларининг мақсади ниҳоятда жиддий”, дейди у.

АҚШ элчихоналари бунга жавобан COVID-19 пандемияси даврида тиббий воситалар тарқатиш, фермерларни қўллаб-қувватлаган қишлоқ хўжалиги дастурлари ва талабаларни АҚШ университетларига юборган таълим ҳамкорликларини тарғиб қилганини эслатган. Аммо Розенблюмнинг айтишича, бу тизимнинг катта қисми 2023 йилдан сўнг йўқ қилинган. Шунингдек, у АҚШ Президенти Дональд Трамп маъмуриятини 1300 дан ортиқ Давлат департаменти ходимларини бўшатгани, USAID дастурларини тугатгани ва “Америка овози” ҳамда “Озодлик радиоси” учун маблағларни қисқартирганини танқид қилган.

“Трампнинг иккинчи президентлик давридан саккиз ойи ўтди ва энди аниқ бўлиб қолди: Марказий Осиёдаги ахборот уруши тугаган. Бунда россияликлар ғалаба қозонгани учун эмас, биз ўзимиз таслим бўлдик. Обрўсизланган Америка – заиф Америка”, дейди у.

Розенблюм, шунингдек, Хитойнинг “Бир камар, бир йўл” ташаббуси орқали минтақада сармоя, инфратузилма ва тил дастурлари билан таъсирини кенгайтираётганини қайд этган. Шунингдек, у талабаларни вазиятнинг жиддийлигини тушунишга чақирган.

“Бу урушда ҳеч кимнинг жасади уйига қайтмаяпти, аммо ҳақиқий қурбонлар бор – мамлакатимизнинг обрўси, дипломатларимиз самарадорлиги ва бошқа давлатларни миллий манфаатларимиз йўлида ҳамкорликка кўндириш қобилиятимиз”, дейди собиқ элчи.

Тадбир якунида Розенблюм журналистларга берган интервьюсида АҚШ ташқи муаммолардан ташқари, ўз ичида ҳам жиддий синовдан ўтаётганини билдирган.

“Энг катта муаммо – бизнинг ўзимиз. Биз халқ сифатида қарор қабул қилишимиз керак: дунё билан ҳамкорлик қиламизми ёки йўқми? Агар дунёдан ўзимизни узиб қўйсак, охир-оқибат камроқ хавфсиз ва камроқ фаровон бўламиз”, дейди Розенблюм.

Маълумот учун, Розенблюм 2019-2022 йилларда АҚШнинг Ўзбекистондаги, 2022-2025 йилларда эса Қозоғистондаги элчиси бўлган.