“Арсенал”нинг собиқ футболчиси яширинча 2-марта уйланди

“Арсенал”нинг собиқ футболчиси ва ҳозирда Бирлашган Араб Амирликларининг “Ал Жазира” жамоасида тўп сураётган Муҳаммад Элнени марокашлик инфлюенсер Ҳанан билан яширинча турмуш қурди. Бу ҳақда “Sözcü” хабар берди.

Нашрнинг ёзишича, гап-сўзлар Ҳанан Instagram саҳифасида жойлаштирган суратлар билан бошланган. Қуйидаги суратда юзи эможи билан ёпилган кишининг Элнени эканини пайқаш мумкин. Бундан ташқари, расмда Ҳанан ҳомиладор экани ҳам акс этган. Мухлислар тасвирларда кўринган жой ва кийим тафсилотларини Элненининг аввалги кўринишлари билан таққослаб, унинг шахсини аниқлашган.

Хабарлар тарқалганидан кейин Ҳанан Instagram саҳифасини ёпиб қўйган. Бироқ жуфтликнинг ўтган йилнинг октябрь ойида Бирлашган Араб Амирликларида никоҳдан ўтгани маълум бўлган. Элненига яқин манбалар никоҳни тасдиқлагач, жуфтлик сирни очиб, ижтимоий тармоқларда тўй маросими суратларини эълон қилган.

Элнени биринчи рафиқаси Амал Эл Ҳенави билан 10 йил бирга яшаган ва уларнинг уч фарзанди бор. Футболчининг марокашлик блогер Ҳанан Можа билан яна турмуш қуриши ҳамда блогернинг ундан ҳомиладорлиги ҳақидаги миш-мишлар баҳс-мунозаралар тўлқинига сабаб бўлган.

Маълумот учун, 33 ёшли мисрлик футболчи 2016-2019 ва 2020-2024 йилларда “Арсенал” сафида тўп тепган. 2019-2020 йилги мавсумда эса Туркиянинг “Бешиктош” клубида ижарада ўйнаган. Ҳозирда унинг “Transfermarkt” порталидаги нархи – 1,8 млн евро.