Зеленский бирор нарсани имзолашга тайёр туриши керак – Трамп 

АҚШ Президенти Дональд Трамп Украина раҳбари Владимир Зеленский “бирор нарсани имзолаши” кераклиги ва унга тайёр туриши шартлигини айтди. Бу ҳақда у кеча, 8 август куни Арманистон Бош вазири Никол Пашинян ва Озарбайжон Президенти Илҳом Алиев билан учрашувда сўз очди.

Трампнинг таъкидлашича, Владимир Путин ҳам, Зеленский ҳам “тинчликни кўришни” хоҳлайди.

“Энди Президент Зеленский ўзига керак бўлган ҳамма нарсани олиши лозим, чунки у бирор нарсани имзолашга тайёр бўлиши керак. Менимча, у бунга эришиш учун барча чораларни кўряпти”, деган Трамп. 

Қолаверса, Трамп Украина ҳудудидан воз кечиш масаласига ҳам алоҳида тўхталиб ўтган. 

“Биз бу йўлни кўриб чиқяпмиз, лекин аслида бир нарсани қайтариб олишни, яна бошқасини эса алмаштиришни хоҳлаймиз. Бу мураккаб масала”, деган Оқ уй раҳбари. 

Трамп, шунингдек, Владимир Путин билан жорий йилнинг 15 август куни АҚШнинг Аляска штатида учрашишини маълум қилган.

“Bloomberg” манбаларига кўра, Россия ва АҚШ Украинадаги можарони ҳал қилиш бўйича келишувни муҳокама қилмоқда. Унга кўра, Киев Донецк, Луганск ва Қримдан воз кечади. Бунинг эвазига Россия Херсон ва Запорожьеда амалдаги фронт чизиғи бўйича ҳужумни тўхтатади.

“The Telegraph” маълумотига кўра, Украина халқаро миқёсда Россиянинг ушбу ҳудудлар устидан назоратини тан олмайди, лекин фронт чизиғи бўйича ўт очишни тўхтатишга тайёр. Зеленский йўқотилган ҳудудларни Россияга беришни қатъиян рад этган, аммо вақт ўтиши билан уларнинг бир қисмини дипломатик йўл билан қайтариш имконини берадиган келишувни излашга тайёрлигини билдирган. Москва эса Киевга ҳудудий ён бериш эҳтимолини инкор этади. 

Эслатиб ўтамиз, аввалроқ Украина Президенти Владимир Зеленский мамлакат ўз ҳудудларини Россия ихтиёрига ўтказмаслигини айтганди. Унинг сўзларига кўра, урушни Россия бошлаган ва тугатишни ҳам унинг ўзи бўйнига олиши керак. Зеленский Украина учун манфаатли бўлган қарорлар қабул қилиниши, тинчликка элтмайдиган қарорлар инобатга олинмаслигини билдирган.