ChatGPT билан шахсий суҳбатлар судда далил бўлиши мумкин – OpenAI раҳбари

Сунъий интеллект билан бўлган шахсий суҳбатлар, психотерапевт ёки адвокат билан бўлган суҳбатлардан фарқли ўлароқ судда далил сифатида ишлатилиши мумкин. Бу ҳақда OpenAI раҳбари Сэм Альтман америкалик комик Тео Воннинг “This Past Weekend” подкастида айтиб ўтди.

Унинг сўзларига кўра, тобора кўпроқ одамлар психологик ёрдам учун ChatGPT’га мурожаат қилаётган бўлса-да, бу ҳар доим ҳам хавфсиз бўлмаслиги мумкин.

“Агар сиз ChatGPT билан энг шахсий масалаларингиз ҳақида мулоқот қилаётган бўлсангиз ва кейинчалик суд иши ёки шунга ўхшаш ҳолат юз берса, биз буни тақдим этишга мажбурлашлари мумкин”, дейди Сэм Альтман.

У бундай ҳолатни жуда нотўғри деб ҳисоблашини айтиб, сунъий интеллект билан ёзишмаларда ҳам “худди шундай махфийлик концепцияси амал қилиши керак”лигини таъкидлаган.

“Қонун врач ёки юрист билан бўлган мулоқот сирини ҳимоя қилади – “врачлик сири бор, юридик махфийлик мавжуд”, аммо ChatGPT билан мулоқот қилганингизда бу қандай бўлиши ҳақида ҳали жавоб йўқ”, дейди OpenAI раҳбари.

Маълумот учун, OpenAI ChatGPT сунъий интеллектли чат-ботига эгалик қилувчи компания ҳисобланади.

Эслатиб ўтамиз, аввалроқ ChatGPT каби сунъий интеллектга асосланган чат-ботлар билан мулоқот баъзи фойдаланувчиларда реал ҳақиқатни қабул қилишда оғир бузилишларга олиб келаётгани хабар қилинган эди.