Исиба истеъфоси ҳақидаги хабарларни рад этди

Аввалроқ, Япония Бош вазири Сигэру Исиба август ойининг охиригача истеъфога чиқмоқчи экани ҳақида хабар берилганди. Исиба ушбу хабарларни рад этди. Бу ҳақда бугун, 23 июль куни вазирга яқин манбаларга таяниб, “Bloomberg” хабар берди.

Маҳаллий ОАВлар Исиба август ойининг бошида истеъфога чиқишини эълон қилмоқчи экани ҳақида ёзган эди. У айни вақтда ҳукмрон Либерал-демократик партия (ЛДП) сайловлардаги мағлубияти учун масъулиятни зиммасига олмоқчи экани айтилган. 

Аммо сиёсатчининг айтишича, истеъфога чиқиш масаласи муҳокама қилинмаган.

Маълумот учун, ЛДП 1955 йилдан бери илк бор парламентнинг ҳар икки палатасида ҳам кўпчилик ўрнини йўқотди. Исиба раҳбарлигидаги ҳукуматнинг рейтинги 20 фоизгача тушиб кетди. 2024 йилнинг кузида ҳукмрон коалиция қуйи палатада ҳам кўпчилик ўринни йўқотган эди. Шундан сўнг, ЛДП ичида Бош вазирни истеъфога чиқариш тарафдорлари кўпайган.

Эслатиб ўтамиз, аввалроқ Япония Бош вазири Сигэру Исибанинг шахсий бойлиги қарийб 33,8 млн иена (218,2 минг доллар)га тенглиги ҳақида хабар берилганди.