Россия яна Одессага йирик дрон ҳужуми уюштирди

Бугун, 3 июль куни Россия армияси Украинанинг Одесса шаҳрига дронлар билан йирик ҳужум уюштирди. Ҳужум оқибатида 4 киши вафот этди. Бу ҳақда Украина Давлат Фавқулодда вазиятлар хизмати хабар берди.

Қайд этилишича, дронлардан бири 9 қаватли тураржой биносига урилган. Оқибатда 7-қаватдан 9-қаватгача бўлган хонадонларни қамраб олган ёнғин юз берган, 7 ёшли бола ва 9 ёшли қиз жароҳатланган. 50 нафар киши бинодан эвакуация қилинган.

“Тутундан заҳарланган болалар шифохонага ётқизилди. Бошқа жабрланганларга барча зарур тиббий ёрдам кўрсатилди. Улар амбулатор шароитда даволанишни давом эттирмоқда”, дейди Одесса вилояти ҳарбий маъмурияти раҳбари Олег Кипер.

Қайд этиш жоиз, Россия қўшинлари мунтазам равишда Украинадаги фуқаролик инфратузилмаларига зарба бермоқда. Масалан, жорий йилнинг 17 июнига ўтар кечаси  Россия Киевнинг турли ҳудудларидаги ўнлаб бинолар ва бошқа объектларга, жумладан, тураржой бинолари, таълим муассасалари ва муҳим инфратузилма объектларига ҳужум қилганди. Ракеталардан бири Соломенский туманидаги тўққиз қаватли тураржой биносига тегиб, бутун кириш эшиги қулаб тушган. Вайроналар остидан 21 кишининг жасади чиқарилган. 18 июнь Киевда мотам куни деб эълон қилинди.

Эслатиб ўтамиз, 28 июнь тонгида Россия қўшинлари Одесса шаҳрига дронлар ёрдамида ҳужум уюштирган, оқибатда эр-хотин ҳалок бўлганди. “Financial Times” эса НАТО Одесса Россия томонидан эгалланишидан чўчиётганини хабар қилган эди.

Дилшод Ҳакимов