Мирзиёев Озарбайжонга боради

Ўзбекистон Президенти Шавкат Мирзиёев Озарбайжон Президенти Илҳом Алиевнинг таклифига биноан жорий йилнинг 2-4 июль кунлари давлат ташрифи билан ушбу мамлакатда бўлади. Бу ҳақда Ўзбекистон раҳбарининг матбуот хизмати хабар берди.

Ташриф дастурига мувофиқ, 2-3 июль кунлари Баку шаҳрида Олий давлатлараро кенгашнинг иккинчи йиғилиши ва бошқа олий даражадаги тадбирлар бўлиб ўтади.

Қайд этилишича, Ўзбекистон билан Озарбайжон ўртасидаги дўстлик, стратегик шериклик ва иттифоқчилик муносабатларини янада мустаҳкамлаш, ҳамкорликнинг устувор йўналишларида кооперация ва алмашинувларни кенгайтириш масалалари кўриб чиқилади.

Шунингдек, Ўзбекистон Президенти 4 июль куни Хонкенди шаҳрида Иқтисодий ҳамкорлик ташкилотининг 17-саммитида иштирок этади ва қатор икки томонлама учрашувлар ўтказади.

Эслатиб ўтамиз, Ўзбекистон Президенти Шавкат Мирзиёев жорий йилнинг 26 апрель куни Озарбайжон Президенти Илҳом Алиев билан телефон орқали мулоқот қилганди. Бу унинг бир ой ичида иккинчи марта Алиев билан қилган телефон суҳбати эди.