Ароқчи МАГАТЭ раҳбарини бепарволикда айблади

Эрон парламенти мамлакатнинг ядро фаолияти хавфсизлигини кафолатловчи чоралар кўрилмагунча, Халқаро атом энергияси агентлиги (МАГАТЭ) билан ҳамкорлигини тўхтатиш қарорини қабул қилди. Бу ҳақда Эрон Ташқи ишлар вазири Аббос Ароқчи IRNA ахборот агентлигига берган интервьюсида сўз очди.

Ароқчи МАГАТЭ бош директори Рафаэль Гроссини бирёқламаликда ва агентлик томонидан Эроннинг ўн йиллик ядро фаолиятига оид саволлар ёпилганини яширгани учун танқид қилган. Унинг таъкидлашича, Гроссининг ҳаракатлари МАГАТЭ Бошқарув кенгашида Эронга қарши сиёсий сабабларга асосланган резолюция қабул қилинишига сабаб бўлган.

Вазир шунингдек, МАГАТЭ раҳбариятини Исроил ва АҚШнинг Эрон ядро объектларига уюштирган ҳужумларини қораламагани учун танқид қилган. У Гроссининг зарар етган объектларни баҳона билан кўздан кечириш ниятини “маъносиз” ва “ёвуз ниятли” деб атаган.

Ароқчининг сўзларига кўра, вужудга келган вазият учун бутун жавобгарлик МАГАТЭ ва унинг раҳбарига юкланади.

Эслатиб ўтамиз, аввалроқ Эрон парламенти мамлакатнинг МАГАТЭ билан ҳамкорлигини тўхтатишга доир қонун лойиҳасини маъқуллаганди. Қонун лойиҳасига кўра, МАГАТЭ ходимлари бундан буён Эрон ядровий иншоотларидаги хавфсизликни текшириш ва ушбу соҳадаги тинч мақсадли фаолиятни назорат қилиш учун фақат мамлакатнинг Миллий хавфсизлик бўйича олий кенгаши розилиги билан Эрон ҳудудига кириш ҳуқуқига эга бўлади.