Ўзбекистонда Volkswagen автомобиллари ишлаб чиқарилади

Жорий йилнинг 4-чорагидан бошлаб Ўзбекистонда Volkswagen автомобилларини оммавий ишлаб чиқариш бошланади. Бу ҳақда “Ўзавтосаноат” АЖ хабар берди.

Қайд этилишича, Volkswagen брендининг Ўзбекистон бозоридаги мавжудлиги 2019 йилда Жиззах шаҳридаги ишлаб чиқариш майдончасида Caddy енгил тижорат автомобиллари ва Skoda Kodiaq оилавий кроссоверининг йиғилиши билан бошланган.

IV Тошкент Халқаро инвестиция форуми доирасида Volkswagen AG ва “Ўзавтосаноат” АЖ таркибий корхонаси – “Alyans Auto” компанияси ўртасида замонавий енгил автомобиллар, седанлардан тортиб то тўлиқ ўлчамли кроссоверларгача бўлган модель қаторини кенгайтириш бўйича янги келишув имзоланган.

“Минтақанинг юрагида жойлашган Ўзбекистон автомобиль ишлаб чиқариш ва экспортини ташкил этиш учун кенг имкониятлар очади. Ушбу ҳамкорликни биз Volkswagen'нинг бозордаги барқарор иштирокини кенгайтириш йўлидаги муҳим қадам деб биламиз”, дейди Volkswagen AG бошқарув кенгашининг савдо, маркетинг ва сотувдан кейинги хизмат кўрсатиш бўйича аъзоси Мартин Сандер.

Билдирилишича, лойиҳа доирасида янги ишлаб чиқариш қувватларини ишга тушириш, маҳаллийлаштириш даражасини ошириш, технологияларни узатиш ва мамлакатнинг автомобиль саноати экспорт салоҳиятини ривожлантириш режалаштирилган. Оммавий ишлаб чиқаришни бошлаш 2025 йил IV чорагига мўлжалланган.

Маълумот учун, 2019 йилдан бошлаб корхона “Jizzax Auto” бренди остида Volkswagen ва Skoda расмий ишлаб чиқарувчиси ва дистрибьютори сифатида фаолият кўрсатган. Volkswagen компаниясининг BPDD корпоратив аудити натижаларига кўра, 2025 йилда компания “Alyans Auto” номи остида ребрендинг ва фаолиятини давом эттирган.