АҚШ Россияни табриклади

north_east

Пентагон раҳбари Россияни агрессор деб атади

АҚШ Давлат котиби Марко Рубио бугун, 12 июнь куни россияликларни америкаликлар номидан Россия куни билан табриклади. Рубионинг тегишли баёноти АҚШ Давлат департаменти сайтида эълон қилинди.

“Қўшма Штатлар Россия халқини порлоқ келажакка интилишларини давом эттиришда қўллаб-қувватлашга содиқ қолади. Фурсатдан фойдаланиб, биз АҚШнинг Россия ва Украина ўртасида мустаҳкам тинчликка эришиш учун Россия Федерацияси билан конструктив ҳамкорликка содиқлигини яна бир бор тасдиқлаймиз.Тинчлик мамлакатларимиз ўртасидаги ўзаро манфаатли муносабатларни мустаҳкамлашга хизмат қилади, деб умид қиламиз”, дейилади баёнотда.

Маълумот учун, Россия куни Россия Федерациясида давлат байрамидир. ТАСС ахборот агентлигининг эслатишича, 1990 йил 12 июнда Россия Совет Федератив Социалистик Республикаси (РСФСР, СССР таркибига кирувчи) халқ депутатларининг биринчи қурултойи РСФСРнинг давлат суверенитети тўғрисидаги декларацияни қабул қилди. Ҳужжатда Россия Федерацияси Конституцияси ва қонунларининг Совет Иттифоқининг қонун ҳужжатларидан устунлиги эълон қилинди, барча фуқаролар, сиёсий партиялар ва жамоат ташкилотлари учун тенг ҳуқуқлар, қонун чиқарувчи, ижро этувчи ва суд ҳокимиятларининг бўлиниши принципи ва минтақаларнинг ҳуқуқларини сезиларли даражада кенгайтириш зарурати тасдиқланди.

Декларацияни РСФСР Олий Кенгашининг ўша пайтдаги раиси Борис Елцин имзолаган.

Россия Федерацияси Президенти лавозимини эгаллаган Елцин 1994 йил 2 июнда 12 июнни давлат байрами – РСФСР Давлат суверенитети тўғрисидаги декларация қабул қилинган кун деб эълон қилиш тўғрисидаги фармонни имзолади.

Эслатиб ўтамиз, кеча, 11 июнь куни Ўзбекистон Президенти Шавкат Мирзиёев Россия Президенти Владимир Путин билан телефон орқали мулоқот қилиб, Россия етакчиси ва кўп миллатли халқини Россия куни билан самимий табриклаганди.