Франция Фаластинни тан олишга қатъий бел боғлаган – ТИВ раҳбари

Франция Ташқи ишлар вазири Жан-Ноэль Барро ўз мамлакати Фаластин давлатини тан олишга қатъий тайёрлигини билдирди. Бу ҳақда у RTL телеканалига берган интервьюсида сўз очди.

“Яқин кунларда Нью-Йоркда бўлиб ўтадиган конференция муносабати билан биз бир қатор давлатлар ва барча манфаатдор томонларни, хусусан Фаластин миллий маъмуриятини, минтақанинг араб мамлакатларини Фаластин давлатининг ташкил топиши ва мавжудлигига тўсқинлик қилаётган барча ғовларни бартараф этишга ундашга қатъий бел боғлаганмиз”, деган ТИВ раҳбари.

Унинг сўзларига кўра, бу йўлда ҲАМАС ҳаракатининг қуролларни ташлаши мутлақ зарурат бўлиб қолмоқда. 

“Акс ҳолда, Ғазо ва Фаластин учун барқарор ва тинч келажак мумкин бўлмайди”, дея таъкидлаган у. 

Маълумот учун, жорий йилнинг 17–20 июнь кунлари Бирлашган Миллатлар Ташкилотининг Нью-Йоркдаги қароргоҳида Исроил-Фаластин можаросини ҳал этиш бўйича халқаро конференция бўлиб ўтади. Унда “икки халқ учун икки давлат” тамойили асосида низони тартибга солиш масаласи кўриб чиқилади. Тадбир Франция ва Саудия Арабистони иштирокида ташкил этилган бўлиб, унда Фаластин давлатини тан олишнинг янги формати, шу билан бирга, Исроил хавфсизлигини кафолатлаш чоралари муҳокама қилинади.

Эслатиб ўтамиз, аввалроқ Франция раҳбари Фаластинни тан олиш кераклигини бир неча бор айтган. Илк бор у июнь ойида ўзи ҳамраислик қиладиган икки давлат ечими бўйича халқаро конференция доирасида Франция Фаластин давлатини тан олиши мумкинлигини айтганди. Президентнинг айтишича, конференция Фаластинни тан олиш масаласини ниҳоят ҳал қилишни режалаштирмоқда. Кейинчалик “Исраэл ҳаём” нашри ҳам Саудия Арабистони ва Франция жорий йилнинг июнь ойида Исроил иштирокисиз Бирлашган Миллатлар Ташкилоти ҳомийлигида Нью-Йоркда Фаластин давлатини тан олиш бўйича халқаро анжуман ўтказиши ҳақида мақола эълон қилди. Нашрнинг ёзишича, ушбу анжуманда Фаластин давлатини тан олиш бўйича аниқ муддатлар ва ижро механизмларни ўз ичига олган кенг қамровли йўл харитаси ишлаб чиқилиши режалаштирилган. Франция ва Саудия вакиллари бошчилигида бўлиб ўтадиган анжуманда мунозаралар ва расмий сессиялар ўтказилади ҳамда Фаластин давлатини барпо этиш учун амалга ошириладиган доиравий режа ишлаб чиқилади. Ушбу ташаббус Исроилнинг бу борадаги позициясини бутунлай четлаб ўтади. Қолаверса, 19 май куни кечқурун Елисей саройи матбуот хизмати уч давлат раҳбарларининг қўшма баёнотида Франция Президенти Эммануэль Макрон ҳамда Буюк Британия ва Канада Бош вазирлари Кир Стармер ва Марк Карни Исроилнинг Ғазода жанговар ҳаракатларни қайта бошлаганига кескин қарши чиқди ҳамда Исроил ҳукуматини “ўзининг жирканч баёнотлари” учун танқид қилганди. Нетаньяху, ўз навбатида, баъзи Ғарб давлатлари раҳбарларининг бундай баёнотлари ўринсиз, деган фикрни билдирди.