Россия танқидчилари Парижда Макроннинг ҳайкалини ўғирлаб кетди (видео)

Кеча, 2 июнь куни Франция Президенти Эммануэль Макроннинг ҳайкали Париждаги “Гревен” мум ҳайкаллар музейидан ўғирлаб кетилди. Бу ҳақда “Le Figaro” хабар берди.

Аниқланишича, икки аёл ва бир эркакдан иборат уч нафар шахс музейга оддий меҳмонлар сифатида кирган ва ҳожатхонада музей ходимлари формасини яширинча кийган. Улар Франция Президентининг ҳайкалини захира чиқиш эшиги орқали олиб чиқиб кетган. Тахминан 40 минг евро турадиган Макроннинг мумдан ясалган ҳайкали адёл билан ўралган.

Ҳодисадан кўп ўтмай музейга ўзини Greenpeace ташкилотининг фаоли деб таништирган эркак қўнғироқ қилиб, айнан ўзи ва унинг шериклари ҳайкални ўғирлаганини билдирган.

Ҳайкал Париждаги Россия элчихонаси биноси олдига олиб борилган ва у ерда: “Украина ёнмоқда, бизнес давом этмоқда”, деган баннер ёнига ўрнатилган. Фаоллар, шунингдек, “Уран”, “Газ” деган ёзувларни ҳам жойлаштириб,  уруш фонида Франция ва Россия ўртасида давом этаётган энергетика ҳамкорлигига ишора қилган.

Greenpeace’га кўра, 2024 йилда Франция Россиянинг суюлтирилган газининг Европадаги энг йирик импортчисига айланган, шунингдек, кимёвий ўғитлар импортини оширган. Ташкилот бош котиби Жан-Франсуа Жюльяр эса Макронни Россия билан савдо алоқаларини давом эттираётганини танқид қилмоқда. Ҳозирда воқеа юзасидан тергов олиб борилмоқда.

Маълумот учун, Россия Бош прокуратураси 2023 йил март ойида Greenpeace’ни “чет эл агентларини молиялаштиргани ва Россияга қарши ташвиқот олиб бораётгани учун” номақбул ташкилот деб эълон қилган. Ташкилот эса бу қарорга муносабат билдирар экан, Россиядаги 1992 йилдан бери фаолият юритаёган бўлими тугатилганини эълон қилган ва Бош прокуратуранинг қарорини “бемаъни, масъулиятсиз ва бузғунчи қадам, мамлакат манфаатларини ҳимоя қилиш билан умуман боғлиқ эмас”, деб баҳолаган.