Мигрантларга Россияга кириши учун янги талаб қўйилади

Жорий йилнинг 30 июнь кунидан бошлаб Россия билан визасиз режимда бўлган мамлакат фуқаролари Россияга киришидан олдин электрон ариза қолдириши шарт ва буни амалга оширмаганлар мамлакат ҳудудига киролмайди. Бу ҳақда Россия Ички ишлар вазирлиги вакили Ирина Волк хабар берди. 

Маълум қилинишича, 30 июнь куни Россияга хорижий фуқаролар ва фуқаролиги бўлмаган шахсларнинг кириши ва чиқиши тартибини синовдан ўтказиш бўйича экспериментнинг иккинчи босқичи бошланади. Бу эксперимент Россия ҳукуматининг 2024 йил 7 ноябрдаги 1510-сонли қарорига мувофиқ амалга оширилади.  

Ушбу санадан бошлаб, визасиз тартибда Россияга кириш учун хорижий фуқаролар (шу жумладан вояга етмаган ёки муомалага лаёқатсиз шахсларнинг қонуний вакиллари) саёҳат режасидан камида 72 соат олдин Россияга кириш ҳақида электрон ариза тўлдиришлари шарт бўлади.

Агар кириш учун зудлик билан зарурат мавжуд бўлса (масалан, шошилинч даволаниш зарурати, яқин қариндошнинг оғир касаллиги ёки ўлими), ариза сафардан камида 4 соат олдин топширилиши мумкин.

Электрон аризани фақат хорижий фуқаролар учун мўлжалланган “RuID” мобил иловаси орқали тўлдириш мумкин.

Қайд этилишича, ушбу чора миграцион оқимлар устидан назоратни такомиллаштириш бўйича олиб борилаётган тизимли ишларнинг навбатдаги муҳим босқичи ҳисобланади.

Шу билан бирга, хорижликлар учун яратиладиган рақамли профиль давлат хизматларини, жумладан миграция йўналишидаги хизматларни олиш тартибини соддалаштиради ҳамда олдиндан Россияга киришга қўйилган эҳтимолий чекловлар ҳақида маълумот олиш имконини беради.

Бундан ташқари, мобил иловада фойдаланувчининг Россия чегарасини кесиб ўтганлиги тўғрисидаги маълумотлар ҳам электрон шаклда акс этади.

Эслатиб ўтамиз, аввалроқ жорий йилнинг 30 июнидан бошлаб Россия Федерациясида мигрантларнинг рақамли профилини жорий этиш бошланиши ҳақида хабар берилганди.