Маск Трамп маъмуриятидан кетаётганини эълон қилди

Америкалик тадбиркор ва миллиардер Илон Маск ҳукуматдаги лавозимидан кетаётганини эълон қилиб, мамлакат Президенти Дональд Трампга миннатдорлик билдирди. Бу ҳақда у Х’даги саҳифасида ёзди.

“Менинг махсус ҳукумат ходими сифатидаги ваколатларим муддати якунланаётгани сабабли, беҳуда харажатларини қисқартириш имконини бергани учун Президент Дональд Трампга миннатдорлик билдирмоқчиман”, деб ёзди у.

Қайд этиш жоиз, Илон Маскнинг Ҳукумат самарадорлиги департаменти (DOGE) раҳбарлигидан кетиши ҳақидаги миш-мишлар бир неча ҳафтадан бери юради. Апрель ойи охирида АҚШ ҳукумат йиғилишида ҳам Маск истеъфосига ишора қилган.

“Сизнинг ажойиб ҳукумат аъзоларингиз билан ишлаш мен учун шараф бўлди. Шунчаки барчангизга миннатдорлик билдирмоқчиман. Сиз билан ишлаш шараф эди, ҳаммаси учун раҳмат”, деган эди ўшанда Маск. 

Бундан олдин Трампнинг ўзи ҳам Маск бошқараётган ҳукумат департаменти “маълум муддатда” ўз фаолиятини тўхтатишини ва Илон Маск ўзининг бизнесини бошқаришга қайтишини айтган.

Кейинчалик Маск ҳам ҳукуматдаги иш эмас, балки бизнесига кўпроқ вақт ажратишни режалаштираётганини маълум қилган.

Бундан ташқари, ОАВда Маскнинг Трамп маъмурияти аъзолари билан бир неча бор жанжаллашгани ҳақида ҳам ёзилган. Масалан, илгари Илон Маск ва Трампнинг асосий савдо маслаҳатчиси Питер Наварро ўртасида божхона тарифларини жорий этиш борасида келишмовчилик юзага келгани маълум бўлган. Маск Европадан импортга юқори бож жорий этишга қарши чиққан, Наварро эса “Маск фақат ўз манфаатларини ўйлайди”, деган. Кейинроқ Маск Наваррони очиқчасига “аҳмоқ” деб атаган.

Шунингдек, Илон Маск АҚШ Давлат котиби Марко Рубио билан ҳам штат қисқартиришлари борасида жанжаллашгани хабар қилинганди. Трамп эса бу хабарга жавобан, Рубио ва Маскнинг муносабатлари “зўр” эканини айтган.

DOGE’нинг ҳаракатлари минглаб агентлик ходимларини ишдан бўшатишга ва кўплаб молиявий ёрдам дастурларини тўхтатиб қўйишга олиб келди.

Эслатиб ўтамиз, аввалроқ “The Washington Post” Илон Маск сиёсий чап ҳужумларидан чарчагани учун АҚШ маъмуриятини тарк этишга тайёр экани ҳақида ёзган эди. Маскнинг фикрича, унинг йўқлиги DOGE ишининг самарадорлигига салбий таъсир кўрсатмайди, чунки департамент ходимлари жараённи аллақачон йўлга қўйган.