Россияда мигрантларга бир нечта телефон рақамини ишлатиш тақиқланиши мумкин

Россия Давлат Думасининг Меҳнат, ижтимоий сиёсат ва фахрийлар ишлари бўйича қўмитаси раҳбари Ярослав Нилов хорижликларнинг бир нечта абонент рақамига эга бўлишини тақиқловчи қонун лойиҳасини ишлаб чиқди. Бу ҳақда ТАСС хабар берди.

Қайд этилишича, мигрантларнинг биттадан ортиқ бўлган абонент рақамига эгалик қилишини чеклаш зарурлиги тўғрисидаги қонун лойиҳаси мамлакатда хавфсизлик даражасини ошириш йўлидаги муҳим қадамдир. Бу миллий манфаатларни ҳимоя қилиш ва фуқаролар учун хавфсиз муҳит яратишга қаратилган. Мазкур қонун лойиҳасининг қабул қилиниши замонавий чақириқ ва таҳдидларга самарали жавоб бериш, хорижий фуқароларнинг ўзаро алоқалари устидан назоратни таъминлаш имконини беради.

Ниловнинг сўзларига кўра, глобаллашув ва аҳолининг ҳаракатчанлиги ортиб бораётган шароитда хавфсизлик масаласи долзарб бўлиб қолмоқда.

“Терроризм, жосуслик, фирибгарлик, кибертаҳдидлар кучайиб бораётганини инобатга олиб, мамлакатимизда чет элликлар ва фуқаролиги бўлмаган шахсларнинг SIM-карталарга эгалик қилишини чеклаш чораларини кўриш зарур. Қонуннинг амалдаги таҳририда бу шахслар 10 тагача SIM-картага эга бўлиши мумкин, бу салмоқли кўрсаткич”, дейди депутат.

2025 йил 1 январдан бошлаб хорижликларнинг ўз номига 10 дан ортиқ абонент рақамини рўйхатдан ўтказишига тақиқ кучга кирди. Хорижий фуқаролар ва фуқаролиги бўлмаган шахслар алоқа операторлари билан фақат шахсини тасдиқловчи ҳужжатни кўрсатган ҳолда ва биометрик маълумотлардан мажбурий фойдаланган ҳолда идораларга шахсан келиб, шартномалар тузишлари мумкин.

Россияликлар учун янги қоидалар 2025 йил 1 апрелдан кучга кирган ва уларга 20 тадан кўп бўлмаган SIM-картага эга бўлишга рухсат этилади. Россия Рақамли ривожланиш, алоқа ва оммавий ахборот воситалари вазирлигига кўра, алоқа операторлари хизматлар кўрсатишдан олдин, шу қаторда Ягона идентификация ва аутентификация тизими (USIA) ва Ягона биометрик тизимдан (UBS) фойдаланган ҳолда абонентлар ҳақидаги маълумотларнинг тўғрилигини текшириши керак бўлади.

Эслатиб ўтамиз, аввалроқ Қозоғистонда телефон рақамларини фақатгина ҳукумат портали орқали бериш тизимини жорий этиш режалаштирилаётгани ҳақида хабар берилганди. Мамлакатнинг Рақамли ривожланиш, инновациялар ва аэрокосмика саноати вазирининг ўринбосари Асхат Оразбекнинг сўзларига кўра, ушбу чора телефон фирибгарлигига қарши курашиш мақсадида амалга оширилади. Қозоғистон Рақамли ривожланиш вазирлиги яқин орада тегишли қонунчилик ташаббусини тақдим этади.