Трамп ЕИ ва Apple’га яна бож солиш билан таҳдид қилди

АҚШ Президенти Дональд Трамп жорий йилнинг 1 июнидан бошлаб Европа Иттифоқи (ЕИ) маҳсулотларига 50 фоиз бож солиғини жорий этишни таклиф қилди. Бу ҳақда “Reuters” нашри хабар берди.
 
Нашрга кўра, кеча, 23 май куни Дональд Трамп Европа Иттифоқидан келадиган барча товарларга 50 фоизлик тўғридан тўғри бож жорий этишни таклиф қилган. Бу таклиф 1 июндан амалга оширилиши мумкин. 

Трамп Европа Иттифоқи АҚШга нисбатан адолатсиз муносабатда бўлаётганини ва АҚШнинг ЕИга автомобиль сотишини чеклаётганини таъкидлаган.

“Мен шунчаки айтдим. Энди бу ўйинни ўз услубимда ўйнаш вақти келди. Мен битим излаётганим йўқ. Биз битимни белгилаб қўйдик – бу 50 фоиз. Лекин яна такрорлайман, агар улар ўз заводларини бу ерда қурсалар, бож йўқ”, деган Қўшма Штатлар Президенти.

Европа Иттифоқининг савдо бўйича комиссари Марош Шефчович кеча, 23 май куни АҚШнинг савдо вакили Жеймисон Грир ва АҚШ Савдо вазири Говард Лютник билан ўтказилган телефон суҳбатида Европа Комиссияси икки томон учун мақбул битимга эришишга тўлиқ содиқ эканини билдирган. У, шунингдек, ЕИ ва АҚШ ўртасидаги савдо “таҳдидлар эмас, балки ўзаро ҳурмат” асосида олиб борилиши кераклигини қўшимча қилган.

У, шунингдек, Apple компаниясини огоҳлантириб, АҚШ истеъмолчилари томонидан харид қилинган барча импорт iPhone’ларига 25 фоиз бож солиниши мумкинлигини айтган.

Трампнинг Apple’га нисбатан “ҳужуми” компанияни ишлаб чиқаришни АҚШга кўчиришга ундашга қаратилган навбатдаги ҳаракати бўлиб, аввалроқ автомобиль ишлаб чиқарувчилар, фармацевтика компаниялари ва чип ишлаб чиқарувчилар ҳам шундай босимга учраган. Бироқ АҚШда ҳозирча смартфонлар оммавий ишлаб чиқарилмайди, гарчи АҚШ истеъмолчилари ҳар йили 60 миллиондан ортиқ телефон харид қилишса ҳам. Таҳлилларга кўра, ишлаб чиқаришни кўчириш iPhone нархининг юзлаб долларга ошишига олиб келиши мумкин. 

Эслатиб ўтамиз, 2 апрель куни Оқ уй 185 давлатдан импорт қилинадиган маҳсулотларга янги тариф тизимини жорий этганди. Умумий импорт божи ставкаси 10 фоизни ташкил қилади, айрим мамлакатлар учун эса янада юқори бўлади. Бу ягона тариф тизими 5 апрелдан кучга кирди. Японияга нисбатан эса қўшимча 24 фоизлик тариф белгилангани айтилган. 

Бироқ АҚШ ҳукумати музокаралар ўтказиш учун 90 кунлик кечиктириш муддатини ҳам белгилаган. Шунга қарамай, Вашингтон аллақачон автомобиллар ва эҳтиёт қисмлар  учун 25 фоизлик бож ставкасини амалиётга жорий эта бошлади.

Жалолиддин Раҳмонов