Буюк Британияда миллиардерлар сони рекорд даражада камайди

2024 йил Буюк Британияда охирги 35 йил ичида илк бор миллиардерлар сони кескин камайди. Бу ҳақда “The Sunday Times Rich List 2025” рейтингида маълум қилинди.

Ҳисоботга кўра, мамлакатда ҳозирда 156 нафар миллиардер бор. Бу рақам 2023 йилда 165 эди, 2022 йилда эса энг юқори кўрсаткич – 177 миллиардер қайд этилган.

Шу тариқа, бир йил ичида Британия 9 нафар миллиардерни йўқотган, бу эса 1989 йилдан бери юритиб келинаётган рейтинг тарихидаги энг катта камайиш ҳисобланади.

Қолаверса, 350 нафар энг бой британияликларнинг умумий бойлиги 3 фоизга камайиб, 772,8 миллиард фунт стерлингни ташкил қилган.

Мутахассисларнинг фикрича, бу пасайишга асосий сабаб – АҚШ томонидан жорий этилган савдо чекловлари туфайли глобал фонд бозорларидаги беқарорлик бўлган.

Миллиардерлик мақомини йўқотганлардан бири – Glencore компаниясининг собиқ раҳбари Алекс Бирд бўлди. Унинг бойлиги 991 миллион фунтгача камайган, у рейтингда 140-ўриндан 157-ўринга тушиб кетган.

Бироқ умумий пасайиш фонида Қирол Чарльз III бойлигининг 30 миллион фунтга ортган. Унинг ҳозирги бойлиги 640 миллион фунт стерлингга етган. Бу кўрсаткич билан у собиқ бош вазир Риши Сунакни ортда қолдириб, рейтингда 238-ўринга кўтарилган.

Рейтингда етти йил кетма-кет биринчи ўринни эгаллаб келаётган Ҳиндужа оиласи бу сафар ҳам етакчиликни сақлаб қолган – уларнинг бойлиги 35,3 миллиард фунт стерлингни ташкил этган.

Эслатиб ўтамиз, аввалроқ Россия пойтахти Москва Гонконгни ортда қолдириб, АҚШнинг Нью-Йорк шаҳридан кейин дунёда миллиардерлар энг кўп яшайдиган иккинчи шаҳар бўлгани ҳақида хабар берилган эди.