Россия-Украина урушида қатнашган ўзбекистонлик жазоланди

Россия-Украина урушида қатнашган Ўзбекистон фуқаросига 4 йил озодликни чеклаш жазоси тайинланди. QALAMPIR.UZ суд ҳужжати билан танишди.

Суд ҳужжатига кўра, судланувчи Самарқанд вилоятининг Паст Дарғом туманида яшовчи 1973 йилда туғилган Р.Т. 2021 йилда ишлаш мақсадида Россиянинг Санкт-Петербург шаҳрига борган. 2024 йилнинг январь ойида унинг Россияда бўлиш қоидаларини бузгани аниқланган. У ўзига нисбатан чора кўрилмаслиги учун Россия армиясига ёлланиб, Ленинград вилояти Виборский туманида Украинага қарши ҳарбий ҳаракатларда фаол қатнашган ва ушбу тумандаги жанг майдонида ҳарбий истеҳком (блиндаж) қуришда иштирок этган. Жорий йилнинг 10 январь куни Ўзбекистонга қайтиб келган.

2025 йилнинг 28 апрель куни Жиноят ишлари бўйича Паст Дарғом туман судида мазкур иш кўриб чиқилган. Унда судланувчи Р.Т. кўрсатма бериб, айбига тўлиқ иқрорлик билдирган. Хусусан, у мажбурликдан Россия Қуролли кучлари билан 1 йиллик шартнома тузиб, Озарбайжон, Қирғизистон, Арманистон ва бошқа давлат фуқаролари билан ҳарбий қисмга олиб борилганини айтган. Бундан ташқари у 2024 йилнинг июнь ойида “ўқчи” лавозими келтирилган гувоҳнома олгани, ўша йилнинг июль ойида эса шартнома имзолагани учун 197 минг рубль, бундан ташқари яна 500 минг рубль пул олганини билдирган.

Суд ҳукми билан Р.Т. Жиноят кодексининг 154-моддаси (ёлланиш) 1-қисмида назарда тутилган жиноятни содир этганликда айбли деб топилган ва унга 4 йил озодликни чеклаш жазоси тайинланган.

Эслатиб ўтамиз, ўтган йилнинг ноябрь ойида Украина ҳудудида ҳарбий ҳаракатларда иштирок этган Ўзбекистон фуқароси 5 йил муддатга озодликдан маҳрум қилинганди.