Байденнинг саломатлигида муаммо аниқланди

АҚШнинг собиқ президенти Жо Байден жорий йилнинг 9 май куни Филадельфия шаҳридаги шифохонада тиббий кўрикдан ўтди ва унинг соғлиғида бир неча кичик муаммолар борлиги аниқланди. Бу ҳақда “The New York Times” хабар берди.

Маълум бўлишича, шифокорлар Байденнинг простата безида кичик ўсимта (тугунча) аниқлаган. Нашрнинг таъкидлашича, Байден 82 ёшда ва бу ёшдаги эркакларда простата безига оид муаммолар тез-тез учрайди.

Қолаверса, Байденнинг чап қўлида танга катталигидаги, қора-кўк доғ ҳам пайдо бўлган. Нашрнинг ёзишича, бу нарса Буюк Британия қироличаси Елизавета II’да ҳам вафотидан олдин кузатилган.

“Доғ қисман макияж билан беркитилган бўлсада, у соғлиқ билан боғлиқ хавотирларни келтириб чиқарди. Бу жой инъекция ёки қон томирга боғлиқ муолажа излари бўлиши мумкин”, дейилади хабарда.

Шу билан бирга, Байден яқинда берган баёнотида ўз ютуқлари билан фахрланиб, “собиқ президент Барак Обама ҳам менга ҳавас қилган бўларди”, деган эди. Байденга кўра, унинг саломатлиги жуда ҳам яхши ва унда ҳеч қандай муаммо кузатилмаяпти.

Эслатиб ўтамиз,  Жо Байден президентлик даврида "Обструктив уйқу апноэ синдроми", яъни тунги дам олиш вақтида нафас олишнинг кескин камайиши ёки тўлиқ тўхташи билан боғлиқ кенг тарқалган патология, умуртқа артрит, гиперлипидемия ва ошқозон-ичак тракти, гастроэзофагиал рефлюкс каби касалликларга чалингани ҳақида хабар берилган эди.