Ватикан Рим папаси сайланганига ишора қилди

Бугун, 8 май куни Сикстин капелласининг мўрисидан оқ тутун чиқди ва бу янги Рим папаси сайланганини билдиради. Бу ҳақда “Vatican News” хабар берди.

Маълум қилинишича, Рим-католик черковининг янги раҳбари ким бўлгани ҳозирча аниқ эмас. Янги папанинг номи у оқ либосда Авлиё Пётр собори балконига чиққанидан кейин эълон қилинади.

Маълумот учун, бир кун олдин Ватиканда конклав очилган эди – 133 кардинал Сикст капелласига папани сайлаш учун йиғилган. Понтифик этиб сайланиш учун даъвогарлардан бири овозларнинг учдан икки қисмини – 133 тадан 89 тасини тўплаши керак эди. Конклавда 80 ёшдан кичик бўлган кардиналлар иштирок этган, овоз бериш қатъий махфий тарзда ўтказилган. 

Биринчи уринишдаёқ черков бошлиғини сайлашнинг иложи бўлмаган – кеча, 7 май куни кечқурун капелла мўрисидан қора тутун чиққан. Кейинги иккинчи ва учинчи уруниш ҳам мана шундай бесамар ўтган.

Аслида конклавлар турлича давом этади. Масалан, 2013 йилда аввалги Рим папаси Францискнинг сайланиши папалик тарихидаги энг тезкор сайловлардан бири бўлган. Уни иккинчи куни бешинчи раундда сайлашган. Энг узоқ давом этган конклав деярли уч йил давом этган (1268 йил ноябрдан 1271 йил сентябргача), бу жараёнда учта сайловчи вафот этган.

Эслатиб ўтамиз, Рим папаси Франциск жорий йилнинг 21 апрель куни 88 ёшида инсульт сабаб Ватикандаги қароргоҳида вафот этганди. Унинг дафн маросими 26 апрель куни Ватикандаги Авлиё Пётр майдонида 200 мингга яқин инсон билан ўтказилганди.