Ямандан Исроилга учирилган баллистик ракета аэропортда портлади (видео)

Ямандан Исроилга бугун, 4 май куни учирилган баллистик ракета мамлакатнинг асосий халқаро аэропорти Бэн Гурион аэропорти яқинига келиб, портлаб кетди. Бу ҳақда “The Times of Israel” хабар берди.

Интернетда эълон қилинган кадрларда ҳайдовчилар йўлда машиналарини тўхтатиб, яширинишга ҳаракат қилаётганини кўриш мумкин. Ижтимоий тармоқларда йўловчи терминалидан олинган тутун устуни акс этган суратлар ҳам бор. Ракета аэропортни ўраб турган панжара яқинига қулагани кўринади.

Маҳаллий нашрларнинг хабар беришича, портлаш оқибатида тўрт киши яраланган, яна икки киши бошпанага кетаётганда жароҳатланган.

Бэн Гурион аэропортида парвозлар маълум муддатга тўхтатилди. Зарба аэропортнинг учинчи терминалига кириш йўлини шикастлаган.

Исроил телевидениеси Исроил полициясининг марказий округи бошлиғи Яир Хецронининг фавқулодда хизматлар ва аэропорт ходимлари билан бирга пайдо бўлган кратерда турган тасвирини кўрсатди. Унинг айтишича, полиция Аэропортлар бошқармаси билан биргаликда барча кириш йўлларини ёпмоқда ва жиддий зарар йўқ.

Бироқ, Германиянинг Lufthansa авиакомпанияси ва Испаниянинг Air Europa авиакомпанияси бугун, 4 май куни Тель-Авивга парвозларни тўхтатди.

Эслатиб ўтамиз, ўтган йилнинг декабрь ойида Исроил армияси Яман пойтахти Сано шаҳридаги аэропортга зарба берганди. Ушбу ҳужум чоғида Жаҳон соғлиқни сақлаш ташкилоти (ЖССТ) Бош директори Тедрос Гебреисус самолётга чиқишга тайёргарлик кўраётган бўлган. Ҳужум оқибатида 3 киши ҳалок бўлганди.