Россия Украинанинг 1991 йилги чегараларга қайтишига йўл қўймайди – Москва 

Россия Украинанинг 1991 йилги чегараларигача тикланишига йўл қўймайди. Бу ҳақда бугун, 1 май куни Россия Ташқи ишлар вазирлиги аннексия қилинган Херсон вилоятига учувчисиз самолёт ҳужумини изоҳлар экан, маълум қилди.

Вазирликнинг билдиришича, ҳужум “тинч аҳоли қурбонлари ва жароҳатлари сонини максимал даражада ошириш мақсадида атайлаб дам олиш кунида амалга оширилган”.

“Киев ва унинг ғарбий иттифоқчиларининг 1991 йилги чегаралар доирасида Украинанинг ҳудудий яхлитлигини тиклаш ҳақидаги “бефойда ва асоссиз даъволари” ортида Россия манфаатларига зарар етказиш истаги ётади, бироқ Москва бундай сценарийнинг амалга ошишига йўл қўймайди”, дейилади Россия ТИВ баёнотида.

Россия томони ҳужумга алоқадор барча шахслар аниқланиб, қонун доирасида жавобгарликка тортилишини билдирган. Шунингдек, Москва халқаро ҳамжамият ва тегишли кўп томонлама ташкилотларни воқеага принципиал баҳо беришга ва содир бўлган воқеани қоралашга чақирган.

Маълумот учун, 2014 йилда Қримнинг аннекция қилиниши ортидан Россия Президенти Владимир Путин Будапешт меморандумини ҳамда Россия Украинанинг 1991 йилги чегаралари доирасидаги ҳудудий яхлитлигини тан олган Дўстлик, ҳамкорлик ва шериклик шартномасини бузган деб топилган.

Эслатиб ўтамиз, олдинроқ АҚШ Президенти Дональд Трампнинг махсус вакили Кит Келлогг “Fox News” телеканалига берган интервьюсида АҚШ Украинага можаронинг тугатилиши бўйича 22 та аниқ шартни тақдим этгани ва Киев уларни қабул қилганини, Украина Россия томонидан амалда назорат қилинаётган ҳудудлардан воз кечишга тайёр экани, бироқ бу юридик жиҳатдан тан олинмаслигини айтганди. 

Трампнинг ўзи эса 29 апрель куни ABC News телеканалига берган интервьюсида Россия Президенти Владимир Путин давом этаётган ҳужумларга қарамай, Украинадаги урушни тўхтатмоқчи эканини, Путин уни ҳурмат қилгани учун бутун Украинани эгалламаганини айтди.