Европадаги блэкаутга нима сабаб бўлгани аниқланди

Аввалроқ, Европанинг Испания, Португалия ва Франция каби мамлакатларининг айрим қисмларида элект энергияси узилиб қолгани хабар қилинганди. Юзага келган мазкур узилишларга “ноёб атмосферавий ҳодиса” сабаб бўлгани айтилди. Бу ҳақда Португалиянинг Redes Energéticas Nacionais (REN) электр тармоқлари оператори маълум қилди.

REN томонидан эълон қилинган пресс-релизга кўра, Испанияда ҳароратнинг кескин ўзгариши юқори кучланишли электр узатиш линияларида “аномал куч тебранишлари”га сабаб бўлган. Бунинг ортидан Испания билан бирга Португалия ҳамда Европанинг бошқа мамлакатларида ҳам электр таъминотида узилишлар юз берган. Компаниянинг баҳолашича, электр тармоғининг тўлиқ тикланиши учун тахминан бир ҳафта вақт талаб этилади. 

Испаниянинг Red Eléctrica электр тармоқлари оператори ҳам кенг кўламли электр узилишлари куч қувватининг кескин тебраниши билан боғлиқ бўлганини маълум қилди. Компания вакилининг “El País” нашрига айтишича, тармоқларда жуда кучли қувват оқими тебраниши юз берган. Бироқ муаммонинг аниқ сабаби ҳали номаълумлигича қолмоқда.
 
Электр энергияси узилиши фақат Испания ва Португалия билан чекланмай, Андорра ҳамда Франция ва Бельгия ҳудудларининг айрим қисмларини ҳам қамраб олди. Испанияда юзага келган блэкаут сабабли жамоат транспорти ва светофорлар фаолияти издан чиқди, поездлар ҳаракати деярли тўхтаб қолди. Лиссабон аэропорти эса вақтинча рейсларни қабул қилиш ва жўнатишни тўхтатди. 

Пиреней яриморолидаги электр таъминоти билан боғлиқ муаммо кеча, 28 апрель куни маҳаллий вақт билан соат 12:30 атрофида бошланган. Тахминан беш соат ўтгач, Red Eléctrica Испаниянинг шимолий, жанубий ва ғарбий ҳудудларида электр таъминоти тиклана бошлагани ҳақида хабар берди. “Portugal Resident” портали ҳам Португалия электр тармоғи бошқармаси мамлакатнинг бир қисмида электр таъминотини тиклашга муваффақ бўлганини ёзди. 

“El País” нашрининг ёзишича, Испания ҳукумати кенг кўламли электр тақчиллиги фонида инқирозга қарши қўмита тузган. Қўмита миллий электр тармоқлари оператори Red Eléctrica штаб-квартирасида йиғилган. “Reuters” хабарига кўра, Испания ва Португалия ҳукуматлари вакиллари юзма-юз учрашиб, электр узилишларини муҳокама қилган. 

“Financial Times” нашри ушбу носозликни Европанинг яқин тарихидаги энг йирик муаммолардан бири сифатида баҳолади. Нашр ҳисоб-китобларига кўра, кенг кўламли электр узилишидан сўнг Испания ва Португалия энергия тизимлари 10 гигаваттдан ортиқ қувват йўқотган.

Эслатиб ўтамиз, жорий йилнинг 9 февраль куни соат 11:00 ларда битта маймун 22 млн киши истиқомат қиладиган бутун Шри-Ланкани электрсиз қолдирган эди. Мамлакат Энергетика вазири тармоқдаги трансформаторга маймун теккани, бу эса тизимда номутаносибликни келтириб чиқарганини маълум қилган.