Оқ уй ҲАМАСга таҳдид қилди

Америка Қўшма Штатлари Фаластиннинг ҲАМАС ҳаракати Ғазо секторида ўт очишни тўхтатиш режимини тез орада узайтиришга рози бўлмаса, унга қарши чоралар кўради. Бундай таҳдидли огоҳлантириш АҚШ Президентининг махсус вакили Стив Уиткофф ва Оқ уй Миллий хавфсизлик кенгаши аппаратининг қўшма ёзма баёнотида келтирилган.

Қайд этилишича, 12 март куни воситачилар томонидан янги сулҳ таклифи тақдим этилган.

“12 март куни кечқурун Доҳада Стив Уиткофф ва Миллий хавфсизлик кенгашининг Яқин Шарқ ва Шимолий Африка бўйича катта директори Эрик Трейгер музокаралар йўли билан Ғазода доимий ўт очишни тўхтатишни таъминлаш учун доиравий тузилмани тайёрлашга вақт бўлиши учун Рамазон ва Қурбон ҳайитларидан кейин сулҳни узайтириш бўйича оралиқ таклифни тақдим этдилар” дейилади ҳужжатда.

Маълум қилинишича, ҲАМАС ушбу таклифга розилик билдириш ўрнига “мутлақо амалий бўлмаган талаблар” қўйган.

“Афсуски, ҲАМАС жамоатчилик олдида мослашувчанликни эълон қилиш, хусусий тартибда эса доимий ўт очишни тўхтатмасдан мутлақо амалий бўлмаган талабларни илгари суриш орқали жавоб беришга қарор қилди”, дея қўшимча қилинади баёнотда.

Баёнотда, шунингдек, ҲАМАС раҳбариятига Вашингтоннинг юқорида тилга олинган таклифи ва “яқин вақт ичида амалга оширилиши керак” деган позицияси аниқ етказилгани айтилади.

“ҲАМАС муддатни яхши билади. Ва у шуни билиши керакки, биз муддат тугагач, тегишли равишда жавоб берамиз”, дейилади ушбу ҳужжатда.

Эслатиб ўтамиз, 2 март куни АҚШ Президентининг махсус вакили Стив Уиткофф томонларга янгиланган келишув лойиҳасини тақдим этди. Исроил дарҳол АҚШ ташаббусини қабул қилди. ҲАМАС эса бу ташаббусни қатъиян рад этди ва аввалги келишувларга риоя қилишни давом эттиришини билдирди. Аммо шундан сўнг, Исроил  ҲАМАС ушбу шартларга розилик билдирмаса, ҳарбий ҳаракатларни қайта бошлаши билан таҳдид қилди. Шундан сўнг, Миср ҳам Исроил ва ҲАМАСга Ғазо секторида 60 кунлик сулҳ, гаровга олинган қолган исроилликларни озод қилиш ва урушни тўхтатиш бўйича музокараларни бошлашни ўз ичига олган янги келишув таклифларини тақдим этди.