Исроил ҲАМАСдан гаровдаги 11 кишини талаб қилди

Исроил Фаластиннинг ҲАМАС ҳаракатидан гаровда ушлаб турилган 11 кишини озод қилишни талаб қилди. Бу ҳақда ҲАМАСдаги манбасига таяниб, “Al Jazeera” хабар берди.

Қайд этилишича, Исроил ҲАМАСдан 11 нафар гаровга олинган ва 16 нафар ҳалок бўлганларни топширишни сўраган.

Нашрнинг ёзишича, Исроил ҳукумати Ғазо секторидан озод қилиниши керак бўлганлар орасида Америка фуқаролигига эга бўлган исроиллик аскар Идан Александр ҳам бўлиши кераклигини сўраган. 

Хабарга кўра, бунга жавобан Исроил умрбод қамоқ жазосини ўтаётган 110 нафар фаластинлик маҳбусни, шунингдек, Ғазодаги жанговар ҳаракатлар пайтида қўлга олинган 1100 кишини озод қилишга тайёрлигини билдирган

north_east

Миср Исроил ва ҲАМАСга янги сулҳ режасини таклиф қилди

Маълумот учун, Исроил ва Фаластин ҲАМАС ҳаракати ўртасида сулҳ 19 январь куни кучга кирган эди. Ушбу сулҳ уч босқичдан иборат бўлиши режалаштирилган бўлиб, унда томонлар асирларни ва ҳалок бўлганларнинг жасадларини алмашиши керак. Биринчи босқич 1 март куни тугаган.  

Кейинчалик, 2 мартда АҚШ Президентининг махсус вакили Стив Уиткофф томонларга янгиланган келишув лойиҳасини тақдим этди. Исроил дарҳол АҚШ ташаббусини қабул қилди. ҲАМАС эса бу ташаббусни қатъиян рад этди ва аввалги келишувларга риоя қилишни давом эттиришини билдирди. Аммо шундан сўнг, Исроил  ҲАМАС ушбу шартларга розилик билдирмаса, ҳарбий ҳаракатларни қайта бошлаши билан таҳдид қилди.

Эслатиб ўтамиз, кеча, 13 март куни Фаластин ҳаракати воситачиларга АҚШ фуқаролигига эга гаровга олинган шахсни озод қилишга ва икки фуқароликка эга ҳалок бўлган тўрт нафар асирнинг жасадини топширишга тайёрлигини маълум қилганди. ҲАМАС вакилининг айтишича, бу қадам музокараларни илгари суришга қаратилган “ижобий ишора”дир.