АҚШ Украинага ҳарбий ёрдамни тўхтатишни кўриб чиқмоқда

АҚШ Президенти Дональд Трамп администрацияси Украина Президенти Владимир Зеленскийнинг Оқ уйдаги Овал кабинетда билдирган баёнотларига жавобан, Украинага барча ҳарбий ёрдам етказиб беришни тўхтатиш имкониятини кўриб чиқмоқда. Бу ҳақда АҚШ маъмуриятининг юқори мартабали вакилига таяниб, “The Washington Post” нашри хабар берди.

Манбага кўра, қарор миллиардлаб долларлик таъминотга, жумладан, радарлар, зирҳли техникалар, ўқ-дорилар ва ракеталарга таъсир қилиши мумкин.

CBS News маълумотларига кўра, Зеленскийнинг Оқ уйга ташрифи 10 дақиқалик баҳс-мунозарага айланганидан кейин Украина расмийлари табиий ресурслар бўйича келишувни қайта тиклашга ҳаракат қилган. Бироқ уларга мулоқотни давом эттириш фойдасиз экани айтилган.

CBS манбаларига кўра, АҚШ миллий хавфсизлик бўйича маслаҳатчиси Майк Уолтц Зеленскийдан Оқ уйни тарк этишини сўрашдан олдин унга катта хатога йўл қўйганини ва бу билан ҳам Украина, ҳам АҚШга зарар етказганини билдирган.

Зеленский Оқ уйдан чиққанидан сўнг Европа мамлакатлари расмийлари Вашингтонга қўнғироқ қилиб, қандай қилиб келишувни сақлаб қолиш мумкинлигини сўраган. Бироқ Трамп Зеленский билан гаплашишни истамаган ва унинг администрациясида ҳам энди ҳарбий ҳаракатларни тугатишда қандай ёрдам бериш мумкинлиги борасида ишончсизлик пайдо бўлган.

“Зеленский жанг қилиш, жанг қилиш ва яна жанг қилишни истайди, лекин у Америка ёрдамисиз ғалаба қозона олмайди. Зеленский ҳозир АҚШ билан қайта мулоқот қилишни истаяпти, бироқ мен ҳозир бунга улгурмайман”, деган Трамп, вертолётга чиқиб, Флорида штатидаги Мар-а-Лаго қароргоҳига йўл оларкан.

“Axios” нашри манбаларининг таъкидлашича, Трамп администрацияси юзага келган вазиятда бутунлай Зеленскийни айбламоқда.

“У шунчаки вице-президент (Ж.Д. Вэнс) баёнотларини қабул қилиб, олдинга ҳаракат қилиши мумкин эди, аммо буни ўзига эп кўрмади”, деган Оқ уй расмийси.

“Axios”га кўра, Трампни жаҳлини чиқарган яна бир кичик, аммо муҳим омил Зеленскийнинг костюм киймагани бўлган. Манбаларнинг айтишича, Трамп маслаҳатчилари бир неча бор Зеленскийнинг жамоасига Оқ уй ташрифи чоғида ҳарбий услубдан воз кечиш янада ҳурматлироқ бўлишини тушунтирган.

Зеленский яқин орадаги жамоатчилик олдидаги тадбирларини бекор қилган. “Fox News”га берган интервьюсида у ҳеч қандай хато қилмаганига ишонишини билдирган.

“Биздан ҳам кўра кўпроқ урушнинг тугашини хоҳлайдиган ҳеч ким йўқ. Мен шунчаки Путинни тўхтатиш учун бир томонда бўлишимиз кераклигини айтдим”, деган у.

Украина Президенти билан учрашувдан аввал мулоқот қилган сенатор Линдси Грэм эса Зеленскийга “қармоқни ютиб юбормаслик” ва “ижобий фикр билдириш” бўйича маслаҳат берганини айтган.

“Энди биз Зеленский билан яна иш олиб бора оламизми ёки йўқ, билмайман”, деган Грэм учрашув якунидан сўнг.

Эслатиб ўтамиз, кеча, 28 февраль куни Владимир Зеленский Дональд Трамп билан музокаралар ўтказиш учун Оқ уйга борган эди. Томонлар фойдали қазилмалар бўйича келишув имзолаши кутилган эди. Бироқ томонлар ўртасидаги кескинликдан сўнг бу келишув барбод бўлди.