Дуровнинг Франциядаги ҳибс муддати узайтирилди

Франция суд органлари 25 август куни 39 ёшли Telegram асосчиси Павел Дуровни ҳибсда сақлаш муддатини яна 48 соатга узайтирди. Бу ҳақда терговга яқин манбага таяниб, AFP хабар берди.

Дуров 24 август куни кечқурун Ле Бурже аэропортида қўлга олинган. Журналистларнинг таъкидлашича, сўроқ учун ҳибсга олишнинг дастлабки муддати максимал 96 соатгача давом этиши мумкин. Бу вақт ичида Дуров айбланиши ёки озод этилиши керак.

"Le Provans"нинг ёзишича, Миллий полициянинг Вояга этмаганлар бошқармаси (OFMIN) Дуровни ҳибсга олиш учун ордер берган ва тергов жандармерия миллий кибер бўлими ва фирибгарликка қарши кураш миллий бюросига топширилган. ОАВ маълумотларига кўра, ордер гумон қилинаётган жиноятлар, жумладан, фирибгарлик, наркотик моддалар савдоси, кибербуллинг, уюшган жиноятчилик, болаларга қарши жиноятлар ва терроризмни тарғиб қилиш бўйича дастлабки тергов доирасида берилган.

Дуров ўз платформасидан жиноий фойдаланишни бостириш чораларини кўрмаганликда айбланмоқда.

Франция расмийлари ва ҳуқуқ-тартибот идоралари ҳалигача Дуровнинг ҳибсга олинишига изоҳ бермаган. Париж прокуратураси ТАСС сўровига жавобан тўлиқ матбуот баёноти бугун, 26 август куни эълон қилинишини маълум қилган.

Telegram жамоаси Дуров ҳибсга олинганидан бир кун ўтиб эълон қилинган шарҳида “унинг яширадиган ҳеч нарсаси йўқ” ва “у тез-тез Европа бўйлаб саёҳат қилади” ва платформанинг ўзи Европа Иттифоқи қонунларига мос келишини таъкидлади. Telegram вакилларининг сўзларига кўра, “модерация саноат стандартларига мос келади”.

“Ушбу платформани суиистеъмол қилиш учун платформа ёки унинг эгаси жавобгар, деб даъво қилиш бемаъниликдир”, дейди Telegram.

Россиянинг Париждаги элчихонаси Дуров билан кўришишни талаб қилган, бироқ ҳеч қандай жавоб олмаган ва Францияни ҳамкорлик қилмаётганликда айблаган.

"Дуров ҳам Франция фуқаролигига эга бўлганлиги сабабли, Франция буни ўзининг асосий фуқаролиги деб билади", дейди Россия ТИВ матбуот котиби Мария Захарова.