Россияда вулқон отилди (видео)

Камчатка яриморолининг узоқ шарқида жойлашган Россиядаги энг фаол вулқонлардан бири осмонга 5 километр узоқликдаги кул булутларини сочди ва қисқа вақт ичида самолётлар учун “қизил код” огоҳлантириш даражасига етди. Бу ҳақда Россия Фанлар академиясига таяниб, “Новая газета” хабар берди.

Қайд этилишича, Шивелуч вулқони кеча, 18 август куни тонгда Камчатканинг шарқий қирғоғида содир бўлган 7.0 магнитудали кучли зилзиладан кўп ўтмай отилиб чиқа бошлаган. Россия Фанлар академияси бундан ҳам кучлироқ зилзила юз бериши мумкинлигидан огоҳлантирмоқда.

Академиянинг Вулқонология ва сейсмология институти Шивелуч устидаги кул булути акс этган видеони эълон қилди. У вулқоннинг шарқи ва жануби-шарқидан 490 километрдан ортиқроқ масофага чўзилган. Камчатка вулқон отилишига қарши кураш гуруҳи хабарига кўра, “қизил кодли” кул булути ҳақидаги огоҳлантириш ҳудуддаги барча самолётларни қисқа вақт ичида эҳтиёткор ҳолатга келтирди.

Шунингдек, Вулканология институти олимлари 24 соат ичида 9.0 магнитудали зилзила содир бўлиши мумкинлигидан огоҳлантирди.

Эслатиб ўтамиз, аввалроқ Тайвань шарқий қирғоқларида 6,1 магнитудали зилзила содир бўлгани хабар берилган эди.