Жаҳон иқтисодиёти ва дипломатия университетида контракт нархи оширилди

Жаҳон иқтисодиёти ва дипломатия университетида контракт нархи оширилди. Бу ҳақда олийгоҳ матбуот хизмати хабар берди.

Билдирилишича, университет ҳамда Дипломатик академиянинг Кузатув кенгаши 2024/2-қарори билан 2024-2025 ўқув йили бакалавриат ва магистратурада шартнома асосида ўқитиш тўлов-шартнома янгиланган миқдори тасдиқланган.

Янгиланган тўлов-шартнома миқдори қуйидагича белгиланди:

• 1-босқич талабалари учун стипендиясиз – 29 миллион 428 минг сўм, стипендияли – 35 миллион 642 минг сўм, 
• 2–4-босқич талабалари учун стипендиясиз – 23 миллион 740 минг сўм, стипендияли варианти эса 31 миллион 814 минг сўм этиб белгиланган. 
• Магистратура эса 27 миллион 216 минг сўм деб белгиланган.

Маълумот учун, ЖИДУда 3 йилдан бери контракт нархлари оширилмаган. 2023/2024 йилларда стипендиясиз ўқиш нархи бакалавриат учун умумий – 18,9 миллион сўм, магистратура учун – 25 миллион сўм этиб белгиланган.