Жиззахда маст фуқаролар ресторанда ҳисобни тўламай жанжал кўтарди (видео)

Жиззах вилоятининг Фориш туманида маст ҳолатдаги бир гуруҳ шахслар ресторанда буюртма қилинган таомлар учун тўлов қилмай, жанжал кўтарди. Мазкур ҳолат юзасидан Жиззах вилояти Ички ишлар бошқармаси расмий муносабат билдирди.

Маълум қилинишича, жорий йилнинг 5 август куни соат 21:30 ларда Фориш тумани “Оқтепа” МФЙдаги ресторан ишчилари маст ҳолатдаги бир гуруҳ шахслар буюртма қилинган таомлар учун тўлов қилмай, тартиббузарлик ва жанжал қилаётгани ҳақида ИИБга мурожаат қилган.

Воқеа жойига профилактика инспекторлари ва Қўриқлаш бўлими ходимлари етиб бориб, жамоат тартибини сақлаш чораларини кўрган.

Бироқ тартиббузарлардан бири, аввал судланган аёл, ходимларнинг қонуний талабларига бўйсунмай, жанжални давом эттирган. Шу сабабли у белгиланган тартибда тиббий кўрикдан ўтказилиб, мастлик ҳолатидаги шахсларни вақтинча сақлаш ва реабилитация қилиш пункти – ҳушёрхонага жойлаштирилган.

Тиббий кўрик давомида ушбу фуқаронинг танасида ҳеч қандай тан жароҳати аниқланмаган.

Кейинчалик фуқаронинг қизлари ҳушёрхонага келиб, жамоат тартибини бузган ҳолда ходимларга нисбатан турли ҳақоратли сўзлар ишлатган ҳамда уларга тан жароҳати етказишга уринган.

ИИБ маълумотига кўра, юзага келган вазият қонунчиликда белгиланган тартибда бартараф этилган. Фуқароларга нисбатан қўл кишан, резина таёқ ёки электрошокер каби махсус воситалар қўлланилмаган.

Билдирилишича, ҳозирда мазкур ҳолатда иштирок этган барча шахсларнинг хатти-ҳаракатларига ҳуқуқий баҳо бериш мақсадида терговга қадар текширув олиб борилмоқда.

Эслатиб ўтамиз, аввалроқ Тошкентда маст йўловчи автобус ҳайдовчиси билан жанжаллашиб, транспорт воситасининг олд ойнасини синдирди ҳамда ҳайдовчини уриб, тан жароҳати етказган эди.