“Жавоб кескин бўлади”. Финляндиялик депутат Украинани огоҳлантирди

Финляндиялик сиёсатчи, “Озодлик альянси” партияси аъзоси Армандо Мема Х ижтимоий тармоғида Киевнинг Нижнекамскка уюштирган ва ўн уч кишининг ўлимига сабаб бўлган ҳужумини кескин танқид қилди.

“Европа Иттифоқи бундай фожиалар олдида кўз юмишда давом этмоқда ва нишонларни танлашда ҳеч қандай чекловлар қўймай, ҳарбий ёрдамни сақлаб қолмоқда. Бу ҳолат Иттифоқ ва Ғарб етакчиларининг тўлиқ кўмагида содир этилган ҳарбий жиноятлар рўйхатини тўлдиради. Мен тинч аҳолига қаратилган бу зарбалардан чуқур ғазабда эканимни билдирмоқчиман”, деб ёзди у.

Сиёсатчининг қайд этишича, бундай ваҳшийликлар тинчлик ўрнатиш ва музокаралар йўлидаги барча саъй-ҳаракатларга путур етказади.

“Булар муқаррар равишда янада кескинроқ жавоб қайтарилишига сабаб бўлади. Охир-оқибат, Владимир Зеленский ўзининг масъулиятсиз қарорлари билан Украинада янада каттароқ вайронагарчиликларга туртки бермоқда”, дея хулоса қилган у.

Эслатиб ўтамиз, кеча, 10 август куни Татаристон Ҳукумати Матбуот хизмати республика душманнинг учувчисиз учиш қурилмалари ҳужумига учраганини маълум қилганди. Ҳужум оқибатида 13 киши, жумладан, бир нафар бола ҳалок бўлган. 78 киши ёрдам сўраб мурожаат қилган, улардан 25 нафари шифохонага ётқизилган.

Украина қуролли тузилмалари томонидан Татаристон Республикасининг саноат ва фуқаролик объектларига уюштирилган террорчилик ҳужуми ортидан Россия Жиноят кодексининг 205-моддаси билан жиноят иши қўзғатилди. Республикада мотам эълон қилинди.

Воқеада ҳалок бўлган ўзбекистонликлар 8 нафарни ташкил этмоқда. Мазкур ҳодиса юзасидан Президенти Шавкат Мирзиёевнинг топшириғига мувофиқ, Бош вазирнинг ўринбосари Очилбой Раматов бошчилигида масъул вазирлик ва идоралар вакилларидан иборат Ҳукумат комиссияси тузилди. 

Ҳукумат комиссиясига ҳодиса оқибатида жабрланган Ўзбекистон фуқароларининг ҳолидан хабар олиш ва уларга барча зарур ёрдам кўрсатиш, ҳалок бўлган ўзбекистонликларни эса ҳаво транспортида махсус рейс орқали олиб келиш ва тегишли манзилларга етказиш, шунингдек, уларнинг оила аъзоларига ҳар томонлама кўмаклашиш вазифалари юклатилган.

Кейинроқ Россия Ташқи ишлар вазирлиги расмий вакили Мария Захарова дипломатик идора сайтида Украина Қуролли кучлари Нижнекамскдаги хорижликлар истиқомат қиладиган жойга Россия Федерациясининг дўст мамлакатлар билан қардошлик муносабатларига нифоқ солиш учун мақсадли равишда зарба бергани ҳақида изоҳ қолдирган.