Зеленский ва Кличко Киевдаги энергетика инқирозида бир-бирини айблади

Украина Президенти Владимир Зеленский ва Киев мэри Виталий Кличко ўртасидаги зиддият янада кескинлашди. Зеленский Киев ҳокимиятини Россиянинг энергетика инфратузилмасига берган зарбаларига етарлича тайёргарлик кўрмаганликда айблади. Кличко эса давлат раҳбарига жавоб қайтариб, уни “манипуляция” ва “ёлғончилик”да айблади. Улар бу ҳақдаги баёнотларини ўзларининг Telegram-каналларида эълон қилди.

Сиёсатчилар ўртасидаги янги келишмовчиликка Россия ҳужумларидан кейин Киевда электр энергияси, сув ва иситиш таъминотида юзага келган кенг кўламли узилишлар сабаб бўлди. Зеленскийнинг айтишича, айниқса, Киевдаги вазият оғирлашган. У шаҳар ҳокимияти иситиш мавсумига тайёргарлик кўриш бўйича зарур қарорларни бажармаганини таъкидлади.

Кличко Президентнинг эътирозларини рад этди. Унинг айтишича, Зеленский тилга олган йиғилишларга шаҳар маъмурияти вакиллари таклиф қилинмаган. Бундан ташқари, Киев мэри марказий ҳокимият фавқулодда вазият юзага келган тақдирда пойтахтда амалга ошириладиган чора-тадбирлар режасини келишишни кечиктираётганини билдирган.

Кличко, шунингдек, Зеленский энергетика таъминоти билан боғлиқ ҳақиқий вазиятни қанчалик тушунишини шубҳа остига олган. Мэрнинг эслатишича, Киев Украина ягона энергетика тизимининг бир қисми ҳисобланади. Агар Россия зарбалари бутун мамлакат бўйлаб энергетика инфратузилмасини ишдан чиқараётган бўлса, шаҳар ҳокимияти электр таъминотининг узлуксизлигини мустақил равишда таъминлай олмайди.

Икки сиёсатчи ўртасидаги зиддият бир неча йилдан бери давом этмоқда. Улар бир неча бор бир-бирини ваколатларга аралашиш ва етарлича ҳамкорлик қилмасликда айблаган.

Эслатиб ўтамиз, аввалроқ Владимир Зеленский мамлакатдаги барча электр станциялари у ёки бу даражада шикастланганини маълум қилди. У Испания ва Лотин Америкаси давлатларидан электр станцияларини таъмирлаш учун зарур ускуналар етказиб беришда ёрдам сўраганлиги ҳақида хабар берилган эди.