Зеленский офисининг раҳбар ўринбосари уйида тинтув ўтказилди

Ҳуқуқни муҳофаза қилиш органлари ходимлари Украина Президенти офисининг раҳбари ўринбосари Ирина Мудранинг уйида тинтув ўтказмоқда. Бу ҳақда Олий Рада депутати Алексей Гончаренко маълум қилди.

Қайд этилишича, Украина Миллий коррупцияга қарши курашиш бюроси (УМКкБ) ва Коррупцияга қарши ихтисослаштирилган прокуратура (КҚИП) депутатлар ҳамда юқори мартабали амалдорларга алоқадор жиноий ташкилотни фош этиш бўйича махсус операция ўтказмоқда.

Ҳуқуқни муҳофаза қилувчи органлар маълумотига кўра, ушбу ташкилотга амалдаги ва собиқ халқ депутатлари раҳбарлик қилган. Унинг фаолиятида президент офисининг юқори мартабали амалдорлари ва бошқа шахслар ҳам иштирок этгани айтилмоқда. Ҳуқуқ-тартибот идоралари ҳозирча ишда гумон қилинаётган шахсларнинг исмларини ошкор қилмаган.

Олий Рада депутати Алексей Гончаренко эса Ирина Мудранинг уйида тинтув ўтказилаётганини маълум қилган. У иш бўйича бошқа тафсилотларни келтирмаган.

Шунингдек, Украина ОАВлари операция доирасида собиқ “Мухолифат платформаси – Ҳаёт учун” партияси депутати Вадим Столар ҳам тилга олинганини ёзмоқда. Иш тафсилотлари кейинроқ эълон қилиниши кутилмоқда.

Маълумот учун, Ирина Мудра 2024 йилнинг март ойида Владимир Зеленский томонидан президент офиси раҳбари ўринбосари этиб тайинланган. У президент офисида юридик ва ҳуқуқий масалаларга масъул. Бунгача у адлия вазири ўринбосари лавозимида ишлаган.

Эслатиб ўтамиз, аввалроқ Франциянинг Париж шаҳридаги Елисей саройи – Франция президенти қароргоҳида коррупция иши доирасида тинтув ўтказилганди.