Зайнаб Дайибекова Осиё ўйинлари кумуш медалини қўлга киритди

Бугун, 24 сентябрь куни Япониянинг Айчи–Нагоя шаҳарларида ўтаётган Осиё ўйинларининг 5-куни доирасидаги баҳслар давом этмоқда. Кун доирасидаги қиличбозлик баҳсларида Ўзбекистон делегацияси 12-кумуш медални қўлга киритди.

Сабля йўналишида баҳсларда иштирок этган Зайнаб Дайибекова Ўзбекистон делегацияси ҳисобига навбатдаги кумуш медални қўшди.

Дайибекова финал баҳсида икки карра жаҳон чемпиони, мезбон япон спортчиси Мисаки Эмурага мағлуб бўлди ва яккалик баҳсларини иккинчи ўринда якунлади. Шу тариқа, Зайнаб Дайибекова Айти–Нагоя Осиё ўйинларининг кумуш медаль соҳибасига айланди.

Эътиборлиси, Дайибекова мусобақанинг чорак финал босқичида Ўзбекистон делегацияси байроқдори, Ханчжоу-2022 ёзги Осиё ўйинлари чемпиони Гулистон Пердебаевани мағлубиятга учратиб, ярим финалга йўл олганди.

Ҳозирга келиб Ўзбекистон делегациясининг Осиё ўйинларидаги жами медаллар сони 24 тага (4 та олтин, 12 та кумуш ва 8 та бронза) етди. Шу тариқа, Ўзбекистон умумжамоа ҳисобида 7-ўринга кўтарилди.

Эслатиб ўтамиз, аввалроқ Осиё ўйинларида олтин медаль олган ўзбекистонлик спортчиларга 25 000 АҚШ доллари миқдорда пул мукофоти берилиши ҳақида хабар берилганди.