“Юлдузлар жанги”даги Дарт Вейдернинг қиличи рекорд нархда сотилди

“Юлдузлар жанги” фильмидаги Дарт Вейдернинг ёруғлик қиличи АҚШдаги кимошди савдосида қарийб 5 миллион долларга сотилди. Бу ҳақда “Heritage” аукцион уйининг сайтида хабар берилди.  

“Юлдузлар жанги: Империя жавоб зарбасини беради” ва “Жедайнинг қайтиши” фильмларини суратга олиш жараёнида фойдаланилган реквизит – Дарт Вейдернинг ёруғлик қиличи “Heritage Auctions” савдо уйи майдончасида 4,8 миллион долларга харид қилинган. Бу мазкур кинофраншиза билан боғлиқ кимошди савдосида сотилган энг қиммат буюм.

Қилич фильмлар туркумидаги энг машҳур саҳналардан бирида намоён бўлган.

Аввалроқ, “Юлдузлар жанги”дан кимошди савдосида сотилган энг қиммат буюм худди шу эпизоддаги Люк Скайуокернинг ёруғлик қиличи эди. 2026 йил ёзида у 3,75 миллион долларга сотилган.

Маълумот учун, “Юлдузлар жанги” – 1970 йиллар охирида режиссёр Жорж Лукас томонидан ўйлаб топилган ва амалга оширилган, кейинчалик кенгайтирилган ягона фантастик олам доирасида яратилган 13 та бадиий фильм, шунингдек, ўйинли ва анимацион сериаллар, бадиий телефильмлар, ҳужжатли фильмлар, китоблар, комикслар, видеоўйинлар, аттракционлар, ўйинчоқлар ва бошқа асарларни ўз ичига олган машҳур ва кенг кўламли медиафраншиза ҳисобланади.

Эслатиб ўтамиз, аввалроқ “Титаник” фильми суратга олинаётганда Роуз ва Жекнинг хайрлашув саҳнасида реквизит вазифасини бажарган эшик аукционда 718 минг долларга сотилганди.