Европарламентда Трампнинг яланғоч ҳолдаги ҳайкали кўргазмага қўйилди

Кеча, 6 октябрь куни Франциянинг Страсбург шаҳридаги Европа парламенти қароргоҳида АҚШ Президенти Дональд Трампнинг яланғоч ҳолдаги олтин суви юритилган ҳайкали кўргазмага қўйилди. Бу ҳақда “Spiegel” хабар берди.

Қайд этилишича, “Orange Plague” (“Тўқ сариқ ўлат”), шунингдек, “Адолатсизлик қироли” номи билан машҳур ушбу сатирик ҳайкални даниялик ҳайкалтарош Йенс Галсхиот ясаган.

Ҳайкалда Трамп яланғоч ҳолда, бир эркакнинг елкасида ўтирган ҳолатда тасвирланган. Бир қўлида у ҳаддан ташқари узун гольф таёғини ушлаб турибди. Пойдевори билан биргаликда ҳайкалнинг баландлиги қарийб 2,5 метрни ташкил этади ва муаллифнинг маълумотларига кўра, 23 каратли олтин суви билан қопланган.

Ҳайкал Европарламентнинг энг гавжум жойларидан бирида намойиш этилган. Кўргазма 8 октябргача давом этади. АҚШ Президентининг ўзи ҳозирча ушбу ҳайкалнинг пайдо бўлишига изоҳ бергани йўқ.

Галсхиотга асарни Европарламентда намойиш этишга сўлчилар фракциясидан бўлган даниялик евродепутат Пер Клаусен таклиф қилган.

“Агар кимдир Европа парламентида ушбу ҳайкалнинг намойиш этилишига чидай олмайдиган даражада аразчи бўлса, унга жаҳон майдонида ҳеч вақо йўқ”, дейди у.

Муаллифнинг ғоясига кўра, ушбу асар Трамп сиёсатига нисбатан танқид ҳисобланади. Ҳайкалтарош АҚШ Президентини иқлим инқирозини ҳал қилиш йўлидаги асосий ғовлардан бири деб атайди.

Эслатиб ўтамиз, аввадроқ Германиянинг Сельм шаҳри яқинидаги фермер маккажўхори даласида Россия Президенти Владимир Путин ва АҚШ Президенти Дональд Трамп тасвирланган улкан лабиринт яратганди.