Европага бораётган мигрантлар сони кескин камайди

Европага денгиз орқали бораётган мигрантлар сони кескин камайди, бироқ ҳалок бўлганлар ва бедарак йўқолганлар сони ўсишда давом этмоқда. Бу ҳақда Халқаро миграция ташкилоти (ХМТ) хабар берди. 

Қайд этилишича, 2026 йил бошидан бери Европага денгиз орқали 60 мингга яқин мигрант ва қочқинлар борган. Бу ўтган йилдагига нисбатан 39 фоизга кам дегани.

БМТ билдиришича, Европага олиб борувчи денгиз йўналишлари кўчиб ўтувчилар учун дунёдаги энг хавфли (ўлим даражаси юқори) йўллардан бири бўлиб қолмоқда. ХМТ маълумотларига кўра, камида 2,3 минг киши ҳалок бўлган ёки бедарак йўқолган, ваҳоланки бир йил олдин бу кўрсаткич 2 минг кишини ташкил этган.

Сафарга отланган мигрантлар сонининг энг сезиларли камайиши Италияга олиб борувчи Марказий Ўрта Ер денгизи йўналишида қайд этилган – 55 фоизга, 21,4 минг кишигача. Шу билан бирга, ушбу йўналишда ҳалок бўлганлар сони 844 тадан 996 тагача ошган.

Грецияга 20,4 минг киши етиб борган, Шарқий Ўрта Ер денгизи йўналишида ҳалок бўлганлар сони эса 284 тадан 417 тагача кўпайган. Испания, ўз навбатида, Атлантика ва Ғарбий Ўрта Ер денгизи йўналишлари бўйлаб борган 16,8 минг мигрантни қабул қилган. У ерда 879 киши ҳалок бўлган ёки бедарак йўқолган.

Кўплаб кема ҳалокатлари ва ғойиб бўлиш ҳолатлари қайд этилмай қолаётгани сабабли, қурбонларнинг ҳақиқий сони, эҳтимол, анча юқори бўлиши мумкин. Шу билан бирга, январь ойидан сентябрь ўрталаригача 17 мингга яқин мигрант денгизда ушланиб, Ливияга қайтарилган. ХМТ халқаро ҳамкорликни мустаҳкамлашга, одам савдоси ва суиистеъмолчиликка қарши курашишга, шунингдек миграциянинг хавфсиз ва қонуний йўлларини кенгайтиришга чақирмоқда.