Европада 7 та самолётга бомба билан таҳдид қилинди

Европанинг бир нечта мамлакатида еттита йўловчи самолётига бомба қўйилгани ҳақида хабар берилди. Таҳдидлар сабаб айрим самолётлар бошқа аэропортларга йўналтирилди, қолганлари эса қўнганидан кейин текширилди. Барча рейслар хавфсиз қўнди, самолётларда портловчи қурилмалар топилмади. Буюк Британия ҳукумати таҳдидларни атайлаб тарқатилган ёлғон хабарлар деб баҳолади. Бу ҳақда “The Guardian” хабар берди.

Қайд этилишича, ҳодисалардан иккитаси Буюк Британиядан учган самолётлар билан боғлиқ. Улардан бири Лондоннинг Хитроу аэропортидан, иккинчиси эса Манчестер шаҳридан парвоз қилган. Манчестер шаҳридан Испаниянинг Мурсия шаҳрига учган Ryanair самолётини аэропортда фавқулодда хизматлар кутиб олган. Испания расмийлари текширувдан кейин самолётда портловчи моддалар топилмаганини маълум қилган.

Буюк Британия Транспорт вазирлиги вакили таҳдидлар жиддий эмаслигини билдирган ва йўловчиларни хавотирга тушмасликка чақирган. Ҳукумат вакилининг айтишича, мамлакатда эҳтимолий таҳдидлар, жумладан, атайлаб тарқатилган ёлғон хабарларни текшириш ва уларга жавоб қайтариш бўйича хавфсизлик тартиблари мавжуд.

Польшанинг Варшава шаҳри яқинидаги Модлин аэропорти ҳам бомба таҳдиди сабаб вақтинча ёпилган. Бунга Лондоннинг Хитроу аэропортидан учган Польшанинг LOT авиакомпаниясига тегишли самолётнинг бошқа аэропортга йўналтирилиши сабаб бўлган. Варшавадаги Фредерик Шопен аэропортига қўниши керак бўлган Boeing 737 Max самолёти Модлин аэропортига йўналтирилган.

Самолёт қўнгач, йўловчилар ундан туширилган ва хавфсизлик текшируви ўтказилган. Ҳеч қандай портловчи қурилма топилмаган. Модлин аэропорти вакили Адам Шабловскийнинг AFP агентлигига айтишича, текширувлардан кейин аэропорт қайта очилган ва одатдаги тартибда ишлай бошлаган.

Бундан ташқари, Копенгагендан Варшавага учаётган Scandinavian Airlines (SAS) самолётига ҳам бомба таҳдиди келиб тушган. Бироқ самолёт Варшавадаги Фредерик Шопен аэропортига қўнган. Текширув давомида портловчи қурилмалар аниқланмаган, аммо аэропортнинг бир қисми вақтинча ёпилган.

Италияда ҳам иккита Ryanair самолёти бомба таҳдиди сабаб текширилган. Улардан бири Лиссабондан, иккинчиси Дублиндан Римга учган. Дублиндан келаётган самолётни Италия ҳарбий-ҳаво кучларининг қирувчи самолётлари кузатиб борган. Ҳар иккала рейс Римдаги Фьюмичино аэропортига хавфсиз қўнган ва текширувларда портловчи моддалар топилмаган.

Болгария Транспорт вазирлиги маълумотига кўра, Бергамодан учган Wizz Air ва Дублиндан Софияга йўл олган Ryanair самолётларига ҳам бомба таҳдиди ҳақида хабарлар келиб тушган. Ҳар икки самолётда тахминан 180 нафардан йўловчи бўлган. Рейслар хавфсиз қўнган, текширувларда портловчи қурилмалар аниқланмаган.

Шунингдек, ҳодисалардан бир кун олдин Лондоннинг Лутон аэропортидан Болгария пойтахти Софияга учаётган Wizz Air самолёти ҳам бомба таҳдиди сабаб йўналишини ўзгартирган. Самолёт Венгриянинг Будапешт шаҳрига фавқулодда қўнган ва уни Венгрия қирувчи самолёти кузатиб борган. Авиакомпания таҳдид парвоз вақтида келиб тушганини билдирган.

Ҳозирча ушбу таҳдидларнинг ўзаро боғлиқлиги аниқланмаган. Терговчилар уларнинг ортида бирор давлат турганига оид далиллар топилмаганини билдирган. Шунга қарамай, Европа мамлакатлари ҳуқуқ-тартибот идоралари вазиятни кузатиб, текширувлар юзасидан ўзаро маълумот алмашмоқда.

Ковентри университетининг авиация хавфсизлиги бўйича ташриф буюрувчи профессори Филип Баумнинг айтишича, сохта бомба таҳдидлари деярли ҳар куни учраб туради. Унинг сўзларига кўра, бундай хабарларнинг аксариятини ҳазил қилиш ёки бирор сабаб билан парвозни кечиктиришни истаган шахслар тарқатади.