Еттинчи қаватдан йиқилган ҳомиладор аёл тирик қолди (видео)

Россиянинг Владивосток шаҳрида ҳомиладор аёл кўп қаватли уйнинг еттинчи қаватидан йиқилиб тушганига қарамай, оғир жароҳатларсиз омон қолди. Шифокорлар аёлнинг ҳомиласини сақлаб қолишга муваффақ бўлган. Бу ҳақда “Первый канал” хабар берди.

Воқеа кеча, 10 июль куни содир бўлган. Маълумотларга кўра, аёл ўша куни кечаси ухлай олмай, деразаларни тозалашга қарор қилган. У деразанинг ташқи қисмини артаётган пайтда мувозанатини йўқотиб, пастга йиқилиб тушган. Аёлнинг айтишича, у деразанинг очилмайдиган ташқи қисмини тозалашга уринган. Шу пайтда дераза токчасига тиз чўкиб, узоқроқ жойга қўл узатган ва йиқилиб кетган.

“Мен деразани ташқи томондан юваётган эдим. Дераза токчасига тиззам билан чиқдим ва узоқ бурчагини артиш учун қўлимни узатдим. Шунда пастга йиқилиб тушдим. Менда бирорта ҳам суяк синиши аниқланмади, фақат енгил кўкаришлар бўлди. Мени тўлиқ текширишди, ультратовуш текшируви қилишди, ҳатто боланинг жинсини ҳам айтишди. Чақалоғим зарар кўрмади”, дея воқеани сўзлаб берган Екатерина.

Шифокорлар аёлни зудлик билан шифохонага олиб бориб, барча зарур текширувлардан ўтказган. Натижада жиддий жароҳатлар ёки синишлар аниқланмаган. Ҳомиладорлик ҳам хавфсиз давом этаётгани маълум қилинган.

Маҳаллий ОАВларнинг маълумотларига кўра, аёл 28 ёшда бўлиб, ҳомиладорлигининг 30 ҳафтасида бўлган. Ҳозирда у шифокорлар назорати остида қолмоқда.

Мутахассислар бундай баландликдан йиқилишдан кейин бундай ижобий ҳолат бўлиши жуда кам учрашини таъкидламоқда. Москва шаҳридаги Склифосовский номидаги Шошилинч тиббий ёрдам илмий-тадқиқот институти шифокорлари эса бундай ҳолатларда ташқи жароҳатлар бўлмаса ҳам, ички шикастланиш хавфи мавжудлигини эслатган.

Институтнинг реанимация бўлими раҳбари Александр Шакотко баландликдан йиқилган барча беморлар албатта чуқур тиббий текширувдан ўтиши кераклигини айтган.

“Баъзан беморлар жуда катта баландликдан йиқилиб, фақат тирналишлар билан қолган ҳолатлар ҳам учрайди. Аммо энг катта хавф ички қон кетиш ҳисобланади. У секин ривожланиши мумкин, шунинг учун бундай беморларни ихтисослашган шифохоналарда кузатиш зарур”, дейди мутахассис.

Владивостокдаги ушбу воқеа она ва боланинг соғ-саломат қолиши билан якунланган ноёб ҳолатлардан бири сифатида баҳоланмоқда.

Эслатиб ўтамиз, жорий йилнинг 13 январь куни Тожикистонда Конституциявий суд судьяси Жамшид Жамшидзода тўққизинчи қаватдан йиқилиши оқибатида ҳалок бўлганди.