Яширинча Москвага борган АҚШ разведка раҳбари ким билан учрашгани айтилди

Россия Ташқи разведка хизмати раҳбари Сергей Наришкин АҚШ Марказий разведка бошқармаси (МРБ) директори Жон Ретклифф билан Москвада учрашганини тасдиқлади. Бу ҳақда РБК хабар берди.

“Учрашув бўлиб ўтди, бунда ҳеч қандай ғайриоддий нарса йўқ”, деган Наришкин журналистларга.

Унинг айтишича, учрашувда махсус хизматлар ваколатига кирадиган масалалар муҳокама қилинган.

АҚШ Президенти Дональд Трамп эса Ретклиффнинг Россияга ташрифини “ярим одатий” деб атаган. Шу билан бирга, у МРБ раҳбарининг Москвага ташрифидан “нимадир чиқиши мумкинлиги”ни ҳам истисно қилмаган.

Фотограф Эндрю Лейденнинг X ижтимоий тармоғида ёзишича, Ретклифф Москвага сафаридан бир кун ўтиб, 26 август куни Трамп ишлайдиган Оқ уйдаги Овал кабинетга ташриф буюрган. Учрашувда Пентагон раҳбари Пит Хегсет ва АҚШ Қуролли кучлари штаб бошлиқлари қўмитаси раҳбари Ден Кейн ҳам қатнашган.

Эслатиб ўтамиз, АҚШ Марказий разведка бошқармаси директори Жон Ретклифф Россия пойтахти Москвага 25 август куни эълон қилинмаган музокаралар учун боргани ҳақида хабар берилган эди. Россия Президенти матбуот котиби Дмитрий Песков кеча, 26 август куни махсус хизматлар йўналишида алоқалар бўлганини, бироқ Россия Президенти Владимир Путин Ретклифф билан учрашмаганини маълум қилганди. Унинг сўзларига кўра, президентга барча воқеалар ҳақида зудлик билан ахборот бериб борилади.

Шунингдек, Ретклифф Москвага Россияни НАТОга ҳужум қилиш мумкин эмаслиги ҳақида огоҳлантириш учун боргани ҳақидаги тафсилотлар ҳам маълум қилинган эди. МРБ директорининг ташрифи АҚШ разведкаси Россия яқин йилларда НАТОнинг қатъиятини “синаб кўришга” уриниши мумкинлиги ҳақидаги прогнозларни эълон қилган бир пайтга тўғри келган.