Янги Тошкентдан пойтахт туманлари ва вилоятларга 100 гектардан ер берилади (видео)

Янги Тошкентдан пойтахтнинг ҳар бир туманига ва мамлакатнинг қолган 13 та ҳудудига 100 гектардан майдон ажратилади. Бу ҳақда бугун, 12 октябрь куни Президент Шавкат Мирзиёев Янги Тошкент қурилишини жадаллаштириш масалалари юзасидан инвестор ва тадбиркорлар билан ўтказилаётган очиқ мулоқотда маълум қилди.

Билдирилишича, янги имкониятларни фақат пойтахт тадбиркорлари билан чекламаслик учун Янги Тошкентдан пойтахтнинг ҳар бир туманига 100 гектардан ҳудуд бириктирилган. Энди туман ҳокимлари ўз тадбиркорлари билан ишлаб, янги лойиҳаларни шу майдонларга олиб келиши керак. 

Худди шундай мамлакатнинг қолган 13 та ҳудудига ҳам 100 гектардан майдон ажратилади. У ерларда амалга оширилган инвестициялар тегишли вилоят ёки пойтахт туманининг кўрсаткичларида ҳисобга олинади. 

Бириктирилган ҳудудлардаги ерлар бўйича биринчи аукционда фақат ўша вилоят ёки туман тадбиркорлари қатнашади. 

Президент Янги Тошкент бутун мамлакат ишбилармонлари учун янги имконият майдонига айланиши лозимлигини таъкидлаган.