Volkswagen 50 мингта иш ўрнини қисқартирмоқчи

Volkswagen компанияси харажатларни камайтириш мақсадида 50 мингта иш ўрнини қисқартириш ва автомобиль моделларининг қарийб ярмини ишлаб чиқаришни тўхтатишни режалаштирмоқда. Бу ҳақда “The Guardian” хабар берди.

Қайд этилишича, Германиянинг Volkswagen компанияси Европада Хитой автомобиллари билан рақобат кучайгани ва АҚШга автомобиль экспорти учун божлар жорий этилгани сабаб қийинчиликларга дуч келмоқда.

Компания Германиядаги заводларида йилига 500 мингтагача автомобиль ишлаб чиқариш бўйича ортиқча қувват мавжудлигини аниқлаган. Бироқ қайси заводлар ёпилиши ёки айнан қайси иш ўринлари қисқартирилиши ҳозирча маълум қилинмаган.

Шунингдек, Volkswagen автомобилларидаги моделлар ва уларнинг вариантлари сонини камайтиришни режалаштирмоқда. Компания автомобиллар ишлаб чиқаришдаги “мураккаблик”ни 75 фоизга қисқартирмоқчи.

Volkswagen’нинг Германиядаги ходимлари сони 2023 йилдаги 275 минг нафардан 2026 йил июнига келиб 254 минг нафаргача камайган. Бундан ташқари, АҚШнинг импорт божларидан компания жорий йилда 4,7–5,8 миллиард доллар атрофида зарар кўриши мумкин. Компания эса камроқ модель ишлаб чиқариш орқали харажатларни камайтириш ва самарадорликни оширишни режалаштирмоқда.

“Бизга тобора кучайиб бораётган глобал рақобат шароитида саноат базамизни мустаҳкамлайдиган рақобатбардош муҳит ва савдо сиёсати керак”, деган Қуйи Саксония Бош вазири Олаф Лиэс.

Маълумотларга кўра, Volkswagen электромобиллар бозорида ҳам қийинчиликларга дуч келмоқда. Компания АҚШ бозори учун мўлжалланган ID.4 электромобилини ишлаб чиқаришни апрель ойида тўхтатган. Европада эса Хитой ишлаб чиқарувчиларининг электромобиллари савдоси ортиб бормоқда.