“Вердер”нинг собиқ мураббийи футболни ташлаб, бургер бизнесига ўтди

Германиянинг “Вердер” ва “Герта” клублари собиқ бош мураббийи Александр Нури футболчилик фаолиятини якунлаб, McDonald’sда иш бошлади. Бу ҳақда “The Athletic” нашри хабар берди.

Манбага кўра, 46 ёшли мутахассис ҳозирда McDonald’s франшизаларига эгалик қилувчи тадбиркор сифатида фаолият юритмоқда.

Нури 2026 йил бошидан буён тармоқнинг иккита ресторанини бошқариб келмоқда. Жорий йилнинг июль ойида эса у учинчи ресторанни ҳам ўз бошқарувига олган. Германия Бундеслигасининг собиқ мураббийи ҳозирда 150 нафардан ортиқ ходимни бошқаради.

Қайд этилишича, Нури ресторан бизнесида ишлаш учун махсус тайёргарликдан ҳам ўтган. У ошхонада ишлаш, таом тайёрлаш ва бургерларни грильда пишириш каби жараёнларни ўз ичига олган тўлиқ ўқув курсини якунлаган.

Нури тўлиқ мураббийлик лицензиясини Германия терма жамоаси бош мураббийи Юлиан Нагельсманн билан бир гуруҳда олган.

У асосан “Вердер”даги фаолияти билан танилган. Нури 2016 йилда жамоа бошқарувини вақтинча қабул қилиб, кейинчалик асосий таркиб бош мураббийи сифатида ишлаган. Унинг қўл остида “Вердер” 11 та ўйиндан иборат мағлубиятсиз серия қайд этган. Бироқ 2017 йил октябрь ойида натижалар пасайиб кетгани сабабли мураббий лавозимидан озод қилинган.

Шундан сўнг Нури “Ингольштадт”да ишлади, “Герта”да Юрген Клинсманнга ёрдам берди. Унинг мураббийликдаги сўнгги иш жойи Грециянинг “Кавала” клуби бўлди. Нури ушбу жамоани 2022 йилда тарк этган.

Собиқ мураббий футболдан кетиш қарори пухта ўйланган ва мантиқий бўлганини таъкидлади. У Юрген Клинсманн ва Грегг Берхалтер билан ишлаш даврида орттирган бошқарув тажрибаси ҳозирги бизнесини юритишда унга катта ёрдам бераётганини айтди.

Шу тариқа, Александр Нури футбол майдонларидан ресторан бизнесига ўтиб, янги фаолиятини давом эттирмоқда.