Ўзбекистоннинг биринчи ракеткаси яна ўзгарди

Теннис бўйича “Катта дубулға” туркумига кирувчи АҚШ Очиқ чемпионати якунларидан сўнг WTA теннисчилар рейтингини янгилади. Унда Ўзбекистоннинг биринчи ракеткаси яна ўзгарди.

Қисқа муддат давомида мамлакатнинг биринчи рақами бўлиб турган Мария Тимофеева бу мақомни Камилла Раҳимовага қайтарди. Ҳар икки теннисчи ҳам “US Open-2026” турнирининг асосий тўрида иштирок этди. Тимофеева иккинчи, Раҳимова эса учинчи даврага қадар етиб борди.

Раҳимова рейтингда бирданига 16 поғона юқорилаб, 76-ўринга кўтарилди. Тимофеева эса бир поғона пастлаб, 87-ўринни эгаллаб турибди.

Ўзбекистоннинг учинчи ракеткаси Полина Кудерметова 6 поғона пастлаб, Топ-100’таликни тарк этди. Полина АҚШ Очиқ чемпионати саралаш босқичининг чорак финалида чехиялик Линда Фрухвиртовага 1:6, 3:6 ҳисобида мағлуб бўлганди.

WTA рейтингида қарийб икки йилдан буён етакчилик қилиб келаётган Арина Соболенко биринчи ўринни Қозоғистон теннисчиси Елена Рибакинага бўшатиб берди. Шу тариқа, Рибакина жаҳон рейтингида биринчи ўринни эгаллаган Қозоғистон тарихидаги илк теннисчига айланди.

Эслатиб ўтамиз, аввалроқ Елена Рибакина “US Open” финалида Арина Соболенкони мағлуб этгани ҳақида хабар берилганди. Бу орқали Елена Рибакина 5,5 миллион АҚШ доллари мукофот пули олди.