Ўзбекистонлик теннисчилар “US Open”ни ғалаба билан бошлади

Теннис бўйича “Катта Дубулға” туркумига кирувчи “US Open” турнирида ўзбекистонлик теннисчилар ўз иштирокини бошлади. Мария Тимофеева ва Камилла Рахимова мусобақадаги илк баҳсларини ғалаба билан якунлашди.

Кеча, 31 август куни турнирнинг биринчи даврасида Мария Тимофеева словениялик Тамара Зиданшекка қарши баҳс олиб борди. Учрашувда ўзбекистонлик теннисчи рақибини 6/3, 7/5 ҳисобида мағлуб этиб, кейинги босқичга йўл олди.

Айни пайтда WTA рейтингида 86-ўринни эгаллаб турган Тимофеева иккинчи даврада ўз иштирокини давом эттиради.

Ўзбекистоннинг биринчи ракеткаси Камилла Рахимова ҳам мусобақани муваффақиятли бошлади. У биринчи даврада чехиялик, дунёнинг собиқ иккинчи ракеткаси Барбора Крейчиковани 7/6(4), 6/2 ҳисобида мағлуб этди.

WTA рейтингида 28-ўринда бораётган ва турнирда 27-рақам остида сараланган Крейчикова “Катта дубулға” мусобақаларида яккалик баҳсларининг икки карра ғолиби ҳисобланади.

Шу тариқа, Мария Тимофеева ва Камилла Рахимова “US Open” турниридаги иштирокини ишончли ғалабалар билан бошлаб, мусобақанинг иккинчи даврасига йўлланмани қўлга киритишди.