Ўзбекистонлик аёл Японияда янги сиёсий партия тузди

Ўзбекистонда туғилган Токио шаҳри Сэтагая тумани депутати Орзугул Бобохўжаева Японияда янги сиёсий партия тузиб, мамлакат сиёсий ҳаётидаги фаолиятини кенгайтиришга қарор қилди. Бу ҳақда маҳаллий “Yonhap” нашри хабар берди.

Қайд этилишича, кеча, 14 сентябрь куни Япониянинг Токио шаҳридаги мамлакат Матбуот марказида ўтказилган матбуот анжуманида Орзугул Бобохўжаева ва Япония фуқаролигини олган Жанубий кореялик Чон Жэ Ук янги партия ташкил этилганини маълум қилди. Унга кўра, Орзугул партия раиси, Чон Жэ Ук эса ҳамраис сифатида фаолият юритади.

Маълум қилинишича, янги сиёсий куч “Шинсэйто” (新世黨, “Шинсэй партияси”) деб номланган. Партия номи Чон Жэ Ук ва Орзугулнинг асосий фаолият ҳудудлари бўлган Токионинг Шинжуку ва Сэтагая туманлари номларидан олинган. “Шинсэйто” хорижликлар улуши юқори бўлган Шинжуку туманини ўз фаолиятининг асосий марказларидан бирига айлантиришни режалаштирмоқда.

Билдирилишича, партия ташаббускорлари Японияда хорижликлар сони қарийб 4 миллион нафарга етгани, шу билан бирга жамиятда хорижликларга нисбатан хавотир ва чет элликларни сиёсий масала сифатида кўрсатишга қаратилган кайфиятлар кучайиб бораётганини таъкидлаган.

Хусусан, Орзугулнинг айтишича, турли келиб чиқишга эга инсонлар ўз фарқлари туфайли жамиятдан четда қолиб кетмаслиги керак. У Японияда хорижликлар ва японлар биргаликда яшайдиган, ўзаро ҳурматга асосланган жамият барпо этишни мақсад қилганини билдирган.

Янги партияга асос солганларининг таъкидлашича, Япония фуқаролигини олган икки шахс томонидан сиёсий партия ташкил этилиши мамлакат тарихида биринчи марта содир бўлмоқда.

“Шинсэйто” дастлаб Шинжуку ва Сэтагая туманларида номзодлар кўрсатишни режалаштирмоқда. Чон Жэ Ук эса келаси йил бошида бўлиб ўтадиган маҳаллий сайловларда Шинжуку тумани кенгаши депутати бўлиш учун номзодини қўйиш ниятида эканини маълум қилган.

Партия ҳамраиси Чон Жэ Укнинг айтишича, миллат ва келиб чиқишидан қатъи назар, Япония қонунлари ҳамда маҳаллий жамоа қоидаларига риоя қилиш, бир-бирини ҳурмат қилиш ва хавфсиз яшаш мумкин бўлган жамиятни барпо этиш ҳақиқий кўп маданиятли ҳамжиҳатликдир.

Маълумот учун, Орзугул Бобохўжаева 2007 йилда Японияга борган. У 2023 йилда Токионинг Сэтагая тумани кенгаши сайловида мустақил номзод сифатида иштирок этиб, депутат этиб сайланган ва ҳозир ҳам туман кенгаши аъзоси ҳисобланади.

Эслатиб ўтамиз, аввалроқ Орзугул Бобохўжаева 2023 йилда Японияда депутатликка сайланган биринчи ўзбекистонликлардан бири сифатида танилган эди. Ўша сайловда у Сэтагая тумани ассамблеясига 6 771 овоз билан сайлангани ҳақида хабар берилганди.