Ўзбекистондаги нефть маҳсулотлари захираси қанчага етиши айтилди

Ҳозирги кунда Ўзбекистонда мавжуд нефть маҳсулотларининг захираси икки-уч ойга етади. Бу ҳақда Энергетика вазирининг биринчи ўринбосари Умид Мамадаминов “Ахборот” дастурига берган интервьюсида маълум қилди.

“Ҳозир геосиёсий вазиятда бошқа давлатларда энергетика хавфсизлигига ҳам таҳдид қилинганини кўриб турибмиз. Шунинг учун нефть маҳсулотларининг фақатгина захирасини эмас, бу маҳсулотларнинг ишлаб чиқариш объектларини ривожлантириш жуда муҳим”, дейди у.

Вазир ўринбосарининг билдиришича, ҳозирги кунда Ўзбекистонда нефть маҳсулотлари ишлаб чиқариш ҳажми 1 миллион 200 минг тоннадан ошган. Хусусий тадбиркорлар томонидан ҳам четдан 600-700 яна минг тонна маҳсулот олиб келинади. Мамлакатнинг эҳтиёжи шу ҳисобдан қопланади.

“Куз-қишга алоҳида режа қилиб олганмиз. Етарлича захиралар яратилган ва ички ишлаб чиқаришимиз бор. Шуларни ҳисобга оладиган бўлсак, ўзимизда 100 минг тоннадан ошиқ маҳсулот ишлаб чиқарилади. Яъни мен ишонтириб айтаманки, мана келаси икки-уч ойда бизнинг захирамиз етарли”, дейди Мамадаминов. 

Унинг айтишича, бундан ташқари, куз-қишга тайёргарлик бўйича алоҳида режа тайёрланган.

“Ёқилғи таъминоти бўйича, ёқилғи таъминотининг логистикаси қанақа ишлаши – буларнинг ҳаммаси бўйича вазирлигимиз томонидан ҳар ҳафта йиғилиш ўтказилади. Электр таъминоти, газ таъминоти бўйича ҳам, бутун ёқилғи тизимлари бўйича ҳам алоҳида-алоҳида тўхталиб, биз ҳар ҳафта буни муҳокама қиламиз ва буни аниқ режасини қилиб олганмиз”, дейди у.

Шунингдек, вазир ўринбосарининг айтишича, куз-қиш мавсумида ишлайдиган бригадалар сони ва захиралар бўйича аниқ ҳисоб-китоб мавжуд.

“Ишончим комил, мана бутун тизим ташкилотларимиз, ҳудудлар ва бошқа тармоқ вакиллари билан биргаликда куз-қишни беталофат ўтказамиз”, дейди у.

Эслатиб ўтамиз, аввалроқ Ўзбекистонда жорий йилнинг декабрь-январь ойлари учун 120 минг тонна автобензин захирасини яратиш режалаштирилгани ҳақида хабар берилган эди.