“Ўзбекфильм кино шаҳарчаси” ташкил қилинади

“Ўзбекфильм”нинг 10 гектарлик ҳудудида “Ўзбекфильм кино шаҳарчаси” ташкил этилади. Бу ҳақда бугун, 26 октябрь куни Президентнинг “Ўзбекфильм” киностудиясида киноижодкорлар билан ўтказаётган учрашувида маълум қилинди.

Қайд этилишича, Президент кино яратиш учун замонавий инфратузилма барпо этилишини маълум қилган. “Ўзбекфильм”нинг 10 гектарлик ҳудудида кино хизматлари жамланган ягона индустриал кластер – “Ўзбекфильм кино шаҳарчаси” ташкил этилади.

“Кино шаҳарчаси”да замонавий технологиялар билан жиҳозланган Дубляж ва овозлаштириш маркази қурилади. Икки ойда малакали лойиҳа ташкилотини жалб қилиб, шаҳарчанинг мастер-режаси ва лойиҳа-сметаси ишлаб чиқилади. Қурилиш ишлари кейинги йилнинг март ойидан бошланади.

Кино тизимидаги бўш турган давлат активларини очиқ савдога чиқариш топширилган.

Давлат раҳбари киноижодкорлар учун яна бир ташаббусни маълум қилган. Қуйи Чирчиқ туманидаги “Кўҳинур” сиҳатгоҳи тўлиғича уларнинг ихтиёрига берилади. Мазкур сиҳатгоҳ яқинда замонавий талаблар асосида таъмирланиб, жиҳозланган. У ерда киноижодкорларнинг муносиб дам олиши учун шароит яратилган.

Президент ушбу маскан киночилар куч тўплаб, янги-янги ғоялар устида ишлашига хизмат қиладиган чинакам ижодий масканга айланишини таъкидлаган.

Бундан ташқари, ҳар йили кино соҳасида фаолият юритадиган камида 300 нафар фидойи ходимга республикадаги сиҳатгоҳларда дам олиш ва даволаниш учун бепул йўлланма берилади.