Алвидо, афсона! “Тошкент йўлбарси” 76 ёшида вафот этди

Ўзбек боксининг афсонавий вакилларидан бири, мамлакат тарихидаги илк жаҳон чемпиони Руфат Рисқиев 76 ёшида вафот этди. Бу ҳақда журналист Даврон Файзиев маълум қилди.

Руфат Рисқиев ўзининг ёрқин фаолияти давомида ўзбек спорти тарихида ўчмас из қолдирган. У 1974 йилда Гаванада ўтказилган жаҳон чемпионатида олтин медални қўлга киритиб, Ўзбекистон тарихида бокс бўйича илк жаҳон чемпионига айланган.

Орадан икки йил ўтиб, Рисқиев 1976 йилги Монреаль Олимпиадасида иштирок этиб, финалга қадар етиб борди. У ҳал қилувчи жангда АҚШ вакили Майкл Спинксга имкониятни бой бериб, Олимпия ўйинларининг кумуш медалига сазовор бўлди.

Руфат Рисқиев фаолияти давомида нафақат юқори натижалари, балки рингдаги техникаси, жанговар характери ва маҳоратли жанг услуби билан ҳам мухлислар меҳрини қозонган.

Спортчилик фаолиятини якунлагач ҳам у боксдан узоқлашмади. Рисқиев ёш боксчиларни тарбиялаш билан шуғулланиб, мураббий ва ҳакам сифатида фаолият олиб борди. У ўзининг бой тажрибаси орқали ўзбек боксининг кейинги авлодлари ривожига катта ҳисса қўшган.

Сўнгги йилларда Руфат Рисқиев оғир касаллик билан курашиб келаётган эди.

Руфат Рисқиевнинг номи мамлакат спорт тарихида жаҳон чемпиони ва Олимпиада совриндори сифатида абадий қолади.